Pagsusuri ng Pelikula Pamagat: Dekada 70 Mga Artistang Gumanap a) Vilma Santos (bilang Amanda) Maayos na nagampanan ni Vilma ang kanyang papel bilang si Amanda Bartolome. Muli niyang naipakita na kayang-kaya niyang gampanan ang papel bilang isang ina. Hindi ito ang unang beses na nagpakita si Vilma ng magandang pag-arte bilang isang ina. Gumanap na din siya bilang isang ina sa palabas na Anak at naipakita din niya doon na hindi na iba sa kanya ang pagganap bilang isang ina. Kahit na ang makikita nating ekspresiyon sa kanyang mukha bilang Amanda ay halos puro pagiging seryoso, maayos niya iyong naipakita at hindi siya nagkamali sa bawat ekspresiyon o reaksyon na ipinakita niya. Makikita mo sa kanyang pag-arte ang pagiging matatag at palaban na ina ni Amanda. b) Christopher De Leon (bilang Julian) Si Julian ang tumayong haligi ng isang pamilyang nakasanayang magpahayag ng damdamin, kaya nagkaroon siya ng mga anak na mulat ang kaisipan sa mga nangyayari sa kanilang lipunan at maganda ang pagkakaganap ni Christopher De Leon sa papel niyang iyon. Naipakita niyang mabuti ang mga katangian ng isang ama at naipakita din niya ng maayos ang mga katangian ni Julian na nabanggit sa nobela. Tama naman ang naging mga ekspresiyon ng kanyang mukha. Kahit man siya gaanong naipapakita sa palabas, maayos niyang nagampanan ang kanyang papel. c) Piolo Pascual (bilang Jules) Siya ang panganay na anak nila Amanda at Julian. Sa simula ng palabas ay makikita natin na hindi pa ganoon kabukas ang kanilang isip sa mga nangyayari sa kanilang paligid. Eskwela, babae at paglilibang pa lamang ang kanilang iniintindi pero ng si Jules ay lumaki, sumapi siya sa isang kilusang kontra sa pamahalaan. Doon naipakita niya ang kanyang pagmamahal at katapatan sa bayan. Kahit na siya’y pinahirapan at pinarusahan ng napakabigat, hindi pa din siya nagsalita at pinanatili niyang tikom ang kanyang bibig tungkol sa kanyang grupo. Matagumpay na nagampanan ni Piolo ang kanyang papel. Naipakita niya ng maayos ang tunay na katauhan ni Jules. Makikita mo talaga sa kanyang mga ekspresiyon na ang katauhan ni Jules ay talagang palaban at matapang. Lalo na noong siya’y nadakip at pinahihirapan, bakas sa kanyang mukha ang pagiging matatag at pagiging matapat. Noong siya naman ay binisita ng kanyang pamilya sa bilangguan, makikita mo sa kanyang mga mata, noong ipinagmamalaki niya sa kanyang mga magulang na hindi siya nagsalita tungkol sa kanyang grupo, na talagang siya’y may matibay na paninindigan at hindi siya susuko hangga’t siya’y mamatay. d) Marvin Agustin (bilang Emman) Siya ang ikalawang anak ng mag-asawang Amanda at Julian. Naging manunulat at makita siya. Hindi siya gaanong ipinakita sa palabas pero para sa akin ay naipakita niya ang kanyang dapat ipakita. Naipakita niya ng mabuti ang mga katangiang taglay ni Emman. Maayos niyang nagampanan ang kanyang papel. e) Carlos Agassi (bilang Isagani) Sa kanilang magkakapatid, siya ang unang napasubo sa maagang pag-aasawa. Sa pelikula, makikita mo na siya’y palaging may kausap sa telepono at may ginagawa pa siya habang nagtetelepono. Babae nga siguro ang kausap niya kaya at isa siguro iyon sa mga naging dahilan kung bakit siya maagang nakapag-asawa. Siya’y pumunta ng Amerika para sumali sa US Navy kahit na hindi ito sinangayunan ng kanyang mga kapatid. Naipakita lang mabuti ni Carlos Agassi ang pagiging teenager ni Gani pero hindi na masyado nung siya ay na sa US Navy na. f) Danilo Barrios (bilang Jason) Si Jason naman ay ang miyembro ng kanilang pamilya na may pagkatamad ngunit mabait. Kahit na ayaw niyang bumisita sa Kuya Jules niya noong ito’y nasa kulungan, wala siyang nagawa kundi ang sumama at nagkausap pa sila ng Kuya niya doon. Napansin ng kanyang Kuya Jules na si Jason ay parang gusto ng bumilis ang oras para siya’y lumaki na agad-agad at magkaroon ng sariling kalayaan sa pagkilos at paggawa ng kanyang mga gusto. Tama nga ang kanyang kuya. Si Jason nga ay yung tipo na ngayon magaapura sa oras pero pagdating ng panahon eh magbabago din ang isip. Naipakita ng maayos ni Danilo ang katangiang iyon. Bagay na bagay sa kanya ang papel na Jason. Bata pa din siya noon katulad ni Jason kaya angkop talaga ang naging papel niya.

g) John Wayne Sace (bilang Bingo o Benjamin) Siya ang bunso sa magkakapatid. Angkop ang pangalang Benjamin sa kanya dahil siya nga ang bunso. Siya ay inosenteng bata pa lamang noong mga panahon na nakikipaglaban na ang kanyang mga kuya sa lipunan. Siya ang nagtanong kung bakit pinakawalan pa ang kalapati dahil baka daw hindi na iyon bumalik. Ang sabi ng kanyang ina na babalik pa ang kalapati dahil wala namang ginagawang masama dito para hindi ito bumalik. Hindi masyadong pinapakita si Bingo sa palabas ngunit maayos na naipakita ni John Wayne ang pagiging inosente ni Bingo.

Teknikal na Impormasyon Tungkol sa Pelikula a) Sinematograpiya 1) Ilaw Naging maganda naman ang pag-iilaw sa Pelikula. Meron nga lang ibang bahagi na masyadong madilim. Hindi masyadong kita ang mukha ng mga gumaganap kaya hindi malaman kung anung ekspresyon ang kanilang ipinapakita. Pero sa kabuuan ay naging maayos naman ang ilaw. Kaunting bahagi lamang ang may pagkamadilim pag-iilaw. 2) Anggulo Maganda ang mga anggulong ng mga photographer sa pagkakakuha sa pelikula. Tamang-tama lang ang kanilang mga pwesto habang kinukuhaan ang mga gumaganap. Makikita ng maayos ang mga nangyayari sa pelikula. Walang tabingi o magulong anggulo akong nakita sa buong takbo ng palabas. Tama din ang pagkakapokus ng kamera sa gumaganap. b) Musika at iba pang tunog Nagustuhan ko ang mga musikang ginamit nila sa palabas. Angkop na angkop ang bawat musikang ginagamit sa bawat mahalagang pangyayari. Maganda din ang mga tunog na kanilang ginamit habang kinukuryente si Jules. Malinaw mo ding maririnig ang mga boses ng mga tauhan. Sa kabuuan, maayos ang tunog at musika na ginamit sa palabas. Mensahe or Aral: Para sa akin, ang mga aral na mapupulot natin ditto sa pelikulang ito ay ang pagmamahal para sa bayan. Makikita natin na ang pagmamahal ni Jules para sa bayan upang makamit ang kalayaan na nararapat sa sambayanan. Hindi dapat ito nililimitahan o kinokontrol ng pamahalaan na ang gusto lang ay kapanyarihan. Tama lang ang ginawa ni Jules dahil ganun din ang ginawa ng ating mga bayani ng ipagtanggol nila ang ating bayan sa mga mananakop. Makikita din natin sa pelikula ang pagkakaroon ng isang matatag ng pamilya. Kahit na si Amanda ay isang palaban na ina at nais niyang mas makilala pa ang kanyang sarili, hindi iyon nakasira sa kanyang pamilya kahit na iba ang idinidikta ng kanyang asawa at ng lipunan noong mga panahon na iyon. Ipinakita sa pelikula na ito ang kahalagahan ng isang ina sa pamilya lalong lalo na sa mga pagkakataong katulad ng na sa pelikula. Lagi nating tatandaan na hinding-hindi ka papabayaan ng iyong ina lalong lalo na tuwing kailangan na kailangan mo siya.