es"NOBELANG ROMANSA" Ang nobelang nilikha ni Paulo Coelho na "The Zahir" ay maiuuri natin sa nobelang romansa. Ang nobelang romansa ay tungkol sa pag-ibig. Kadalasan, ito ay nakatuon ang pansin sa dalawang tauhan na nahuhulog ang loob sa isa't isa pero patuloy na may hinaharap na mg hadlang at sa huli ay nagagawa nilang lampasan ang mga ito at nagkakaroon ng masayang katapusan. Ito ay dahil sa makikita sa nilalaman ng libro ang tungkol sa pagmamahalan ng dalawang tauhan —isang hindi pinangalanang manunulat at ang asawa niyang si Esther. Mababasa na ang dalawa ay tunay na nagmamahalan. Bagamat nagkaroon sila ng di-pagkakaintindihan at madaming pinagdaanan gaya ng pag-alis ni Esther o ang pangungulila ng pangunahing tauhan, sa huli ay nagkaroon ng magandang katapusan at nagkita silang muli at naipahayag nila ang pagmamahal nila sa isa't isa.
________________________________________________________________________
"TEORYANG ROMANTISISMO" Ang nobelang ito ay maaari nating ihanay sa teoryang romantisismo. Ang layunin ng teoryang ito ay ipamalas ang iba’t ibang paraan ng tao o sumasagisag sa tao sa pag-aalay ng kanyang pag-ibig sa kapwa, bansa at mundong kinalakhan. Ipinakikita rin sa akda na gagawin at gagawin ng isang nilalang ang lahat upang maipaalam lamang ang kanyang pag-ibig sa tao o bayang napupusuan. Ito ay dahil sa pinapakita sa nilalaman na pumunta pa sa iba't ibang bansa at hinanap sa kung saan-saan ng pangunahing tauhan ang kanyang minamahal. Dito pa lamang ay ipinapakita na gagawin ng tauhan ang lahat para lamang makitang muli at maipadama ang kanyang pagmamahal kay Esther.
"TEORYANG SIMBOLISMO" Ang nobelang ito ay maaari nating ihanay sa teoryang simbolismo. Ang layunin ng panitikan ay ipakita ang mga mahahalagang bahagi ng akda sa pamamagitan ng mga simbolo. Ngunit hindi basta-basta masusuri ang mga simbolismo sa akda. Pinakamainam na alamin muna ang kabuuang konsepto at tema ng panitikan sapagkat ang mga simbolismong napapaloob sa akda ay magkaugnay sa isa’t isa. Ang lahat ng simbolismo ay naaayon sa tema at konseptong ipinapakilala ng may-akda sa mga mambabasa. Ito ay dahil sa pinapakita madalas gumagamit ng mga simbolo ang awtor upang maipahayag ang gusto niyang iparating sa mga mambabasa. Kahit sa pangalan pa lamang ng mismong nobela ay simbolismo na. Ang "The Zahir" ay isang salitang arabo na nangangahulugang hindi kayang hindi mapansin o kaya nakikita(visible). Ito ay sumisimbolo sa kanyang asawa na hindi niya matanggal sa kanyang isip.
"TEORYANG SAYKOLOHIKAL" Ang nobelang ito ay maaari nating ihanay sa teoryang saykolohikal. Ang layunin ng panitikan ay ipaliwanag sa pamamagitan ng pagpapakita ng mga salig (factor) sa pagbuo ng naturang behavior (pag-uugali, paniniwala, pananaw, pagkatao) sa isang tauhan sa kanyang akda. Ipinakikita sa akda na ang tao ay nagbabago o nagkakaroon ng panibagong behavior dahil may nag-udyok na mabago o mabuo ito. Ito ay dahil sa makikita mo ang saykolohikal na impluwensya ng mga pangyayari sa nobela na nakapagbago sa mga kilos o pag-iisip ng pangunahing tauhan. Ito ay makikita sa pagkawala ni Esther. Nagkaroon ng mga bagong pananaw ang pangunahing tauhan tungkol sa mga bagay at iginugol niya ang kanyang mga oras sa pagiging sikat at mayaman na manunulat para lamang magawang maialis sa kanyang isip ang kanyang umalis na asawa.
"TEORYANG MORALISTIKO" Ang nobelang ito ay maaari nating ihanay sa teoryang moralistiko. Ang layunin ng panitikan ay ilahad ang iba’t ibang pamantayang sumusukat sa moralidad ng isang tao – ang pamantayan ng tama at mali. Inilalahad din nito ang mga pilosopiya o proposisyong nagsasaad sa pagkatama o kamalian ng isang kilos o ugali ayon sa pamantayang itinakda ng lipunan. Sa madaling sabi, ang moralidad ay napagkakasunduan ayon na rin sa kaantasan nito. Ito ay dahil sa makikita rito ang pamantayan sa kung ano ang tama at mali para sa mga tauhan. Sa panig ni Esther, inisip niya na tama ang ginawa niyang pag-alis at pag-iwan sa kanyang asawa at sa panig ng pangunahing tauhan na tama ang ginawa niyang pagtrato sa kanyang asawa noong magkasama pa sila. Makikita na ang mga tauhan na ito ay naimpluwensyahan ang pagrarason o ang kanilang moral dahil sa sitwasyon nila. Pero sa huli, nakita nilang parehas mali ang kanilang naging desisyon.
________________________________________________________________________________________________________________________________________________

"MGA PANSIN AT PUNA"

Isang mapupuna sa nobelang ito ay ang paraan ng pagsulat at pagtakbo nito. Mayroon pagkakomplikado ang mismong nobela na maiintindihan lamang ng isang masuring mambabasa. Madadala ang mambabasa sa pagkalito ng pangunahing tauhan at dito unti unting mawawala ang interes ng mambabasa pero nagawa itong pantayin ng romansa at paghahanap ng pangunahing tauhan sa sarili sa naturang nobela. Mapapansin rin ang pagkahilig ni Paulo Coelho sa sign language, magical powers, at intuwisyon.

"MGA TAUHAN"

di-pinangalanang manunulat(Pangunahing tauhan)-isang matagumpay at sikat na manunulat na nakatira sa Paris kasama ang kanyang asawang si Esther na bigla na lamang nawala ng walang paalam matapos dumating ang kanilang relasyon sa di-pagkakaintindihan. Esther-ang asawa ng pangunahing tauhan na may matinding pagmamahal sa kanyang asawa ngunit umalis dahil sa komplikadong relasyon nila ng kanyang asawa at para ang sarili naman ang kanyang asikasuhin. Mikhael(Oleg)-Ang lalaking huling nakita na kasama ni Esther bago siya nawala at nangakong dadalhin ang pangunahing tauhan sa kinaroroonan ni Esther. Dos-isang kaibigan ni Mikhael na tinawagan niya upang patulungan si Esther sa pagpunta sa isang remote village. Jan-isang taong nakasalubong ng pangunahing tauhan sa Kazakhstan, isang may-ari ng isang Hosiery Factory sa Rotterdam na naglakbay din mula sa Istanbul.

"BISANG PAMPANITIKAN"

"BISA SA ISIP" Nalaman ko ang mga suliranin na dapat isaalangalang sa isang relasyon at kung ano ang tunay na ibig sabihin ng kaligayahan. Naiwan at tumatak sa isip ko ang kahalagahan ng relasyon ng tao sa isa't isa.
"BISA SA DAMDAMIN" Nakaramdam ako ng simpatya sa pangunahing tauhan sa unang mga parte ng nobela dahil sa pagkawala ng kanyang asawa at ang mga katanungan ukol dito na hindi niya magawang masagot. Nakaramdam din ako ng galak ng sa huli ay nagkitang muli si Esther at ang manunulat na nagawang magpahayag ng kanilang pagmamahal sa isa't isa.
"BISA SA KAASALAN" Sa tingin ko, magbabago dahil dito ang asal ko sa pag-criticize ko sa mga tingin ko ay komplikado o walang patutunguhang relasyon ng mga tao, ang pagbabago ng tingin ko sa mundo at sa mga taong nakapaligid sa akin at ang persepsyon ko sa tunay na kahulugan ng kaligayahan.
"BISA SA LIPUNAN" Ang kahalagahan nito sa lipunan ay ang pagpapakita nito ng mga paraan ng pakikipagugnayan sa kapwa sa isang lipunan. Magbubunga ito ng mas malalim na samahan at pagkakaintindihan ng mga tao sa lipunan tulad ng pagtutong kalimutan ang mga samaan ng loob.
"MGA MUNGKAHI" Ang mungkahi ko ay ang gawing mas solido ang nobela. Mas bigyang diin pa ang koneksyon ng mga tauhan sa isa't isa. Isa pa ay isaalangalang ng manunulat na mas makuha ang interes ng mga mambabasa.
"REAKSYON"
Sa una medyo nagulat lamang kami sa pagsusuring ito dahil inisip namin na baka hindi namin matapos ito. Pero ng nagtagal, unti unti kaming nagalak at naging interesado sa pagdaan ng mga araw marahil na rin siguro sa unti-unting paghupa ng mga kailangang tapusin sa iba pang mga asignatura at pagluwag ng oras para sa pag-uukol ng pansin sa pagsusuring ito. At tunay na nagpapasalamat nga kami sa pagpapabasa ng librong ito dahil marami kaming natutunan na mga bagong kaalaman tungkol dito at nagawa rin naming i-aplay sa aming sarili ang mga bagay na nakapaloob sa nobelang ito.