KABANATA II

MGA KAUGNAY NA PAG-AARAL AT LITERATURA

Ang pamilya ay binubuo ng ina, ama, at anak. Ang pamilya ang sandigan ng mga anak at siyang gumagamay sa mga anak patungo sa tamang daan. Ang kaibigan naman ay siyang nagsisilbing ikalawang pamilya ng isang mag-aaral, dito nailalabas nila ang kanilang mga saloobin.
Ayon sa mga artikulong nabasa ng mga mananaliksik na “The Importance of Family Life” at “Family values: The Importance of Strong Family Bonds” ay sinasabing importante ang presensya ng mga magulang sa kanilang anak lalo na kung ito ay lumalaki. Ang isang mag-aaral ay magkakaroon ng mga maraming kalituhan, maraming katanungan tungkol sa mga bagay-bagay na kung walang magulang ang siyang mga papaliwanag nito ay mahihirapan siya at maghahanap ng iba na siyang makakaintindi sa kanya. Dahil dito, nagkakaroon ng puwang sa pagitan ng mga magulang at ng anak o mag-aaral.
Base sa pananaliksik, maraming kabataan ngayon partikular na ang mga mag-aaral ay mas malapit sa mga kaibigan nila kaysa sa sariling pamilya, dahil sa pareho sila ng edad, pareho rin sila ng pag-iisip at higit sa lahat pareho sila ng interes. Kadalasan kaya ganyan ang turing ng mga mag-aaral sa kanilang pamilya ay dahil hindi nakikita ng kanilang mga magulang ang kakayahan sa iba’t ibang aspeto. Hindi maiiwasan na magkaroon ng awayan sa pamilya at pagkawala ng magulang, makabubuti sa buhay ng isang tao ang pagkakaroon ng mga kaibigan dahil sila ang tutulong sa iyo upang patuloy na lumaban sa buhay.
Ayon sa mga psychologists at mga doctor sa librong “Adolescence: Guiding Youth Through the Perilous Ordeal”, hindi naman kasalanan ng mga magulang kung sila ay abala sa trabaho at kung minsan ay hindi nabibigyan ng tamang atensyon ang isang bata, ngunit dapat pa rin nilang isipin na sila ay maaaring nagkukulang na sa ilang aspeto bilang isang magulang. Kailangan ang sapat na pagkakaunawaan sa pamilya at pagbibigayan ng oras. Natural sa isang mag-aaral ang mapalapit sa kanyang mga kaibigan lalo na at maaari silang magkita kung gugustuhin nila. Para sa isang mag-aaral, nais niyang magkaroon ng kasama sa kanyang paglalakbay sa buhay na siyang tatayong taga-gabay at marunong umunawa sa kung anong sitwasyon ang kanyang pagdaraanan.
Mahirap para sa isang bata kung mabigat ang kanyang kalooban at dapat niyang harapin ito nang mag-isa. Kung may problema siya sa pamilya dahil sa isang simpleng hindi pagkakaintindihan, ang kanyang tanging takbuhan ay ang kanyang mga kaibigan. Nakakahanap siya rito ng pagkalinga at hindi siya hinuhusgahan nito. Kung lahat ng mga magulang ay marunong na umunawa at makinig sa hinaing ng kanilang anak, hindi magkakaroon ng puwang sa pagitan nila at ng buong pamilya. Huwag agad sumuko sa ganitong pagsubok sapagkat maraming solusyon kung gugustuhin mo. Pahabaan ang pasensya at bigyang halaga ang lahat ng taong importante sa buhay mo.