Naging pambansang usapin ang ahensya ng Bureau of Customs (BoC) kung saan maraming Pilipino ang tumuligsa dahil sa mahigpit na pagbubusisi sa mga balik-bayan boxes na ipinapadala ng mga kababayang Overseas Filipino Workers (OFW).
Mahalaga sa mga migranteng manggagawa ang mga padala dahil ito ay bunga ng ilang buwan at taon na pagtitipid upang makapag-ipon. Ito’y bunga ng kanilang pagsisikap at pagpuporsige na magtrabaho sa ibang bansa. Dala ng mga kahong ito ang malaking pangarap at pagmamahal ng mga OFW sa kanilang mga pamilya. Naglabasan ang iba’t-ibang reklamo ng mga kaanak ng mga OFW sa Pilipinas hinggil sa kulang at nawawalang bagay na kabilang sa mga balik-bayan boxes. Ang iba naman ay nagpost sa mga social media sites upang ipagbigay alam ang sinapit ng kanilang natanggap na padala. Walang ibang sinisi kundi ang BoC na siyang nag-iinspeksyun sa mga padala galing ibang bansa.
Tungkulin ng taga-customs na tingnan ang mga padala na ipapasok sa Pilipinas dahil matatandaang talamak na ngayon ang problema sa droga ng bansa. Ayun kay Bureau of Customs¬ (BoC) Commissioner Bert Lina nasa batas ang pag-iinspeksiyon sa mga kahon ng OFWs. Dagdag pa niya na ginagamit daw ang balikbayan boxes para makapaglipat ng droga. Ngunit salungat sa sinabi ni Lina na nasa batas ang pag-iinspeksyon nila ay marami paring nakakalusot na mga smuggled goods sa bansa. Hindi ba isa itong patunay na ang batas na sinasabi ay hindi naging epektibo sa pagpapatupad nito? Humingi na ng paumanhin si Lina ukol sa isyu at napapabalitang may rebisyun na ang naturang batas.
Kaugnay sa mainit na isyung ito ang kailangan ay malinaw na batas at sistima upang magsilbing palatuntunan at batayan hindi lamang sa ahensya ng Bureau of Customs, Overseas Filipino Workers kundi sa lahat ng mga Pilipino hinggil sa usaping balikbayan box. Tiyak na masusubok kung hanggang saan ang kapangyarihan ng pamahalaan at kakayahan ng BoC sa pagpapatupad ng tamang batas tungu sa ikabubuti ng bansa at ng mga Pilipino.