Para Kay B.
Ni Ricky Lee

Ipinasa ni: Ryan M. Ramirez
IV-Coral
Pinasa kay: G. Aruta
(Guro sa Filipino IV)

Tagpuan Sa San Ildefonso unang nangyari ang lahat. Dito sinimulan ng may akda ang limang kwento ng pag-ibig at dito din natapos. Ang San Ildefonso ay isang bayang palaging mayroong rally laban sa Mayor. Laging may nagpuputol ng mga punong kahoy dito, kaya ganoon na lamang kinamumuhian ng mga mamamayan ang bayang ito. Halos maubos na ang mga punong kahoy dahil sa walang hanggang pagputol ng mga trabahador ng Mayor (Mayor Ignacio) at kapag dumating na ang ganti ng kalikasan mabilis itong malulusaw at mawawasak.
Mga Tauhan
Irene – wirdong batang babae na may photographic memory. Matalino kaya nababansagang wirdo. Nagmahal sa nakaraan na ngakong pakakasalan siya.
Jordan- tinedyer na ulilang lubos matapos pagbabarilin ang mga magulang at masuwerteng nakaligtas sa mga ito sa pamamagitan ng pagtakip ng kaniyang ina sa kanya. Binatang laging pinaguusapang isang anak ng NPA. Guwapo ito na bumihag sa puso ni Irene at pinangakuan ang batang babae na sa paglaki nito ay kanyang pakakasalan.
Mrs. Ignacio – maybahay ng mayor na hindi na maramdaman ang pagmamahal sa kanya ng asawa. Laging tumatalsik ang mga laway.
Elena – ina ni Irene na matagal ng patay ngunit nagpapakita pa rin sa kanya tuwing siya’y may problema. May pulang tali sa buhok at pulang cutex sa mga kuko nito.
Sandra – babaeng nagmahal sa bawal na pagibig. Umibig sa kanyang kapatid na si Lupe. Nagtrabaho sa isang hotel at may tatlong anak at pinakasalan ni Ruben. Lahat sakanya ay dapat fair o patas.
Lupe – kuya ni Sandra, na pangarap maging sikat na gitarista ng isang banda. Naging isang isnatser matapos palayasin ng ama sa kanilang bahay dahil nahuli silang magkapatid na nagtatalik.
Belinda – anak ni Sandra kay Lupe. May parang kakaibang pag-iisip. Kahit ito’y walong taong gulang na ay di pa gaanong makapagsalita.
Erica – isang babaeng taga Maldiaga na hindi marunong magmahal sa kadahilanan na ring ang kinagisnang bayan ay di maruong mag mahal. Napunta sa mundo ng puno ng pagibig at sinubukang pag-aralang mabuti ang umibig. Pinag-aralan niyang ibigin si Jake ngunit hindi niya magawa.
Jake – anak ni Mrs. Baylon na umampon kay Erica. Lahat ng ayaw ng ina niya para sa kanya ay kanyang sinusuway. Babaero ngunit nagbago nang makilala si Erica.
Mrs. Baylon – matandang babae, na ina ni Jake, na may hugis bombilya ang buhok at mahilig dasalan ang urn o abo ng kanyang asawa kasama ang dalawa pa nitong kaibigan na biyuda na rin.
Ester – isang tomboy na ayaw amining tomboy. Umibig kay Sara na katulong ng kanyang ina noong ito’y nabubuhay pa. Mahilig sa kulay na dilaw at simple kung mag make-up at mag-ayos ng buhok.
AJ – baklang anak ni Ester na naging tulay upang magkita ulit sila ni Sara. Mahilig sumali sa mga gay beauty contest.
Bessie – ang babaeng kung sinu-sino ang pinapatulan. Nagbebenta ng mga gamit mula sa mga taong sawi sa pagibig o binansagang mga Capital S. Babaeng magaling umarte ng iba’t ibang tauhan dahil pangarap nitong maging isang artista balangaraw. Naging kaibigan ni Lucas at napamahal na siya dito dahil sa hindi niya ito maakit.
Brigs – ang mapang-trip na basketbolista na anak ni Colonel Moncayao. Nambugbog kay Lucas na naging dahilan ng pag-alis nito sa pad ni Bessie.
Manang Belen – ang tumulong at kumupkop kay Lucas matapos itong mabugbog. Matabang matandang babae na manghihilot. Pinatay ang asawa at ikinulong sa mental hospital. Ang kanyang mga anak ay nasa Australia nang dumating si Lucas itinuring niya na itong parang totoong anak.
Charlie – kaibigan ni Lucas na madalas nitong kainuman at kausap maghapon. Ang asawa nito ay nasa Canada. Siya ay isang aktibista at noon nang nagsusulat ng mga kwento na wala ng kopya ngayon.
Lucas - ang nagsulat ng lahat ng kwento. Ang limang kwentong ginawa niya para kay Bessie. Isang hapon na tigyawatin at pangit ngunit kahit papano nabihag nito si Bessie.

Buod ng Nobela
Ang nobela ay may limang kwento. Dito sinasabing may quota ang pag-ibig. Sa bawat limang umiibig ay isa lang magiging maligaya. Sa unang kwento, makikilala si Irene na naghangad na pakakasalan ni Jordan paglaki nito. Ngunit biglang umalis si Jordan at di na nagpakita. Ngunit isang araw sa isang hotel nagkita sila, ngunit hindi siya maalala ni Jordan pero ang totoo nagkukunwari lamang si Jordan upang makalimot ng tuluyan sa nakaraan. Ang nakaraan ay ang pagiging ulila nito matapos patayin ng mga sinasabing vigilante ang kanyang mga magulang. Isinumpa nitong lalayo sa bayan ng San Ildefonso at sinabing ang bayang iyon ay wawasakin ng apoy. Nagtalik sila ni Irene at pagkatapos nito umalis na lang si Irene sa pagkakadismaya na hindi siya maalala ni Jordan.
Sa ikalawang kwento, may magkapatid na sina Sandra at Lupe na nagmamahalan. Isang araw nahuli silang nagtatalik sa isang bodega. Pinalayas ng ama si Lupe at ito’y pumunta sa maynila. Nagkanobyo ng iba si Sandra, si Ruben. Isang habang naglalakad sila sa dilim ay biglang may nang-isnats ng cellphone ni Ruben at iyon ay si Lupe. Tinawagan ni Sandra ang cellphone ni Ruben upang makausap ang kuya na si Lupe. Nagkikita sila sa isang hotel at may nangyari sakanila. Matapos ang nangyari ay nawala na muli si Lupe at dumating si Ruben upang pakasalan si Sandra kahit ito’y buntis na at ama ay si Lupe.
Sa ikatlong kwento, may isang babaeng taga Maldiaga. Kung saan ang komunidad ay di marunong magmahal. Napunta siya sa kabilang mundo at dito pinag-aralan niyang magmahal. Pinag-aralan niyang mahalin si Jake na anak ni Mrs. Baylon na kumupkop sakanya. Ngunit hindi niya magawang mahalin si Jake at ito’y umalis. Nakilala niya si Mary Cruz, isang director. Niyaya siyang maging TV Host at endorser ng mga sikat na produkto dahil siya ay nakakatuwa at magaling pagdating sa pageendorso. Naging sikat siya at nagpapayo sa mga nakikinig sa radio tungkol sa pag-ibig. Isang araw nakita niya si Mrs. Baylon at dinala siya nito sa bahay nila. Nakita niya si Jake na nasa bintana at hindi kumikibo. Kwento ni mrs. Baylon, hinanap daw ni jake si Erica sa kung saan-saan pati na sa Maldiaga ngunit din ito mahanap ang Maldiaga. Minsan pa raw ay lumusong ito sa ilalim ng dagat at natagpuang walang malay. Hindi na ito makakapagsalita ngunit makakagalaw naman. Iniwan ni Erica ang trabaho niya at inalagaan si Jake.
Sa ikaapat na kwento, si Ester na may limang anak at biyuda na. Sa pagkamatay ng asawa nito ang nagging sandalan niya ay si Sara na matagal niya nang pinagtataguan ng pagmamahal. May nangyari sakanila ni Sara at pagkatapos nun ay umalis na si Sara sa buhay ni Ester. Ngunit nagging Masaya naman kahit papano ang kanyang buhay ng matuklasan niyang bakla ang kanyang anak na si AJ. Malapit sila sa isa’t isa at pawang magkaibigan lamang. Napansin ni AJ na malungkot ang ina, kaya hinanap nito si Sara at natuklasang may asawa na at tatlong anak. Pinuntahan ni AJ at Ester si Sara, nakilala nila si Pio ang kanyang pangit na asawa. Humahadlang si Pio sa pakikipagusap ni Sara kay Ester kaya umuwing malungkot si Ester. Sinundan ni Sara si Ester sa kanilang bahay at sinabing magtratrabaho ulit siya sa pagawaan ng barong nila at para na rin makasama niya ulit si Ester.
Sa ikalimang kwento, may isang babaeng masasabing kung kani-kanino pumapatol, siya ay si Bessie. Minsan napagtripan niyang akitin at tikman ang isang hapon na tigyawatin, si lucas. Si Lucas ay isang writer. Nakitira si Lucas sa pad o condo ni Bessie at doon sila’y naging mas malapit pa sa isa’t isa. Nagkagusto si lucas kay Bessie ngunit ayaw nitong pagsamantalahan si Bessie dahil sabi nito na makikipagtalik lamang siya sa babaeng gusto rin siya. Si Bessie ang nagbigay ng laptop kay Lucas upang gumawa ng mga kwento at ginawa niya ang mga kwento para kay Bessie at kanya itong iaarte. Isang araw dumalaw ang kaibigan ni Bessie na si Brigs na anak ni Colonel Moncayao. Pinagtripan si Lucas na siyang kinagalit nito at hinagis ang damit sa mukha ni Brigs. Nagalit si Brigs dahil ayaw nitong inaagawan ng gamit. Dahil ang damit na suot ni Lucas ay kay Brigs na naiwan nito matapos makipagsiping kay Bessie. Binugbog ni Brigs si Lucas hanggang sa ito’y manghina. Dinala nila si Bessie sa kung saan-saan at tinapon sa isang bangketa. Kinaumagahan umuwi si Bessie sa kanyang pad. Tinulungan niya si Lucas ngunit ayaw nitong magpatulong dahil sa galit. Nakatulog silang dalawa ngunit pakagising ni Bessie wala na si Lucas. Si Lucas ay nawalan ng malay sa kalye at ito’y kinupkop ni Manang Belen. Nakatira ito malapit sa tren. Tinulungan niya si lucas na bumangon uli. Nakilala niya rin si Charlie, ang naging kaibigan niya. Tinulungan din nitong tulakin si Lucas na magsulat ulit. Hinanap ni Bessie si Lucas hanggang sa mapadpad ito sa San Ildefonso. Sa tulay nakita niya si Jordan na hinahanap naman ay si Irene.
Sa pagpapatuloy ni Lucas sa pagsusulat, nagsilabasan ang mga tauhan sa loob ng kuwarto. Ang limang babae na sina Irene, Sandra, Erica, Ester at Bessie. Nagrereklamo sila dahil hindi maganda ang katapusan ng kwento nila. Si Irene na hindi daw siya maalala ni Jordan. Si Sandra ay kontento na. Si Erica na ayaw maging isang parang bangkay na habang buhay si Jake. Si Ester ay nagaalangang magreklamo ngunit naging kontento na rin ito. Si Bessie na naghihintay pa sa katapusan ng kwneto nila ni Lucas. Pinarevise ni Erica at Irene ang kwento nila. Sa kwento ni Erica, napunta si Jake sa Maldiaga at naging katulad na ng mga tao doon. Si Erica ay nakapag asawa ng isang excutive at pinakasalan. Sna Irene at Jordan ay nagkita ng muli at nagpatawaran na.
Suliranin
Ang pagdating ni Brigs at pagbugbog nito kay Lucas at siya’y napalayo kay Bessie. Naging sanhi upang hindi matupad ang pangarap niyang maiarte ni Bessie ang mga kwentong kanyang nilikha.
Wakas
Nagwakas ang nobela ng may mga matutunang aral. Sa limang taong nagmamahal isa lang ang magiging maligaya. Pinuntahan ni Lucas si Bessie sa San Ildefonso natuklasan niyang nakikipag-live in na si Bessie kay Brigs. Mula noon ay namuhay na si lucas ng mag-isa ngunit di na nagsulat ng mga kwento tungkol sa pag-ibig. Nagsulat na lamang siya tungkol sa kanyang bansang nagiging kawawa na.

Mga Teoryang Ginamit

Teoryang Realismo Ang layunin ng panitikan ay ipakita ang mga karanasan at nasaksisan ng may-akda sa kanyang lipunan. Samakatuwid, ang panitikan ay hango sa totoong buhay ngunit hindi tuwirang totoo sapagkat isinaalang-alang ng may-akda ang kasiningan at pagkaefektibo ng kanyang sinulat. Teoryang Eksistensyalismo
Ang layunin ng panitikan ay ipakita na may kalayaan ang tao na pumili o magdesisyon para sa kanyang sarili na siyang pinakasentro ng kanyang pananatili sa mundo
Teoryang Romantisismo
Ang layunin ng teoryang ito ay ipamalas ang iba’t ibang paraan ng tao o sumasagisag sa tao sa pag-aalay ng kanyang pag-ibig sa kapwa, bansa at mundong kinalakhan. Ipinakikita rin sa akda na gagawin at gagawin ng isang nilalang ang lahat upang maipaalam lamang ang kanyang pag-ibig sa tao o bayang napupusuan.
Teoryang Sosyolohikal
Ang layunin ng panitikan ay ipakita ang kalagayan at suliraning panlipunan ng lipunang kinabibilangan ng may-akda. Naipakikita rito ang pamaraan ng mga tauhan sa pagsugpo sa suliranin o kalagayan ng lipunan na nagsisilbing gabay sa mga mambabasa sa magpuksa sa mga katulad na suliranin.
Teoryang Queer
Ang layunin ng panitikan ay iangat at pagpantayin sa paningin ng lipunan sa mga homosexual. Kung ang mga babae ay may feminismo ang mga homosexual naman ay queer.
Reaksyon
Sa aking nabasa, ako ay natuwa dahil napakaganda ng kwento ng nobela. Nalaman ko na bihira lang ang makakakuha ng masayang pag-ibig at magiging maligaya habang buhay. Natutunan ko na ang pagmamahal ay walang pinipiling oras, kahit kailan maaari tayong umibig. Umibig ng tapat at lubos. Nasiyahan ako dahil kahit may mga negatibong bahagi ang mga ugali ng mga tauhan nagagawa pa rin nilang mag mahal ng totoo. Kahit anong pagkatao man ang mayroon sila, kahit magkakaiba man ang panlabas na anyo ng mga tao, lahat sila marunong magmahal ng totoo at lubusan. Na-enjoy ko ang nobela dahil maganda ang bagsakan ng mga salita. Nakikita ko sa aking imahinasyon ang mga nakasulat dito at parang nanunuod lang ako ng mga pelikula. Pelikulang Masasabi kong pinakamagandang pangitain sa aking buhay. Minsa’y parang nakakasama ko pa ang mga tauhan at nakikita sila na parang totoong tao sa aking paligid.

Talambuhay ni Ricky Lee
Si Ricardo A. Lee (Ricky Lee) ay isang manunulat mula sa Pilipinas. Higit siyang popular bilang isa sa itinuturing na pinakamahusay na scriptwriter ng bansa sa larangan ng pelikula at telebisyon, bagamat kilala rin siya sa kanyang masining na kontribusyon sa larangan ng maikling kwento, nobela, dula at pamamahayag.
Nakapagsulat na siya nang mahigit sa 150 naisapelikulang iskrip mula pa noong 1973. Nakapagtamo na siya nang mahigit 50 tropeo mula sa iba't ibang samahang pampelikula; kabilang na dito ang isang Natatanging Gawad Urian. Marami sa kanyang mga pelikula ay naipalabas na sa Cannes, Toronto, Berlin at iba pang mga internasyunal na film festivals. Kabilang dito ang Himala, Moral, Brutal, Relasyon, Karnal, Bulaklak ng Maynila, Gumapang Ka sa Lusak, Jaguar, Salome, The Flor Contemplacion Story, Dolzura Cortes, Muru-Ami, Bagong Buwan, Rizal, Nasaan Ka Man, Madrasta, Anak at Dubai.
Bilang fiksyunista, mandudula at mamamahayag, si Lee ay nakapagkamit din ng maraming pagkilala sa pagsusulat ng fiksyon mula sa Pilipino Free Press, Don Carlos Palanca Memorial Awards for Literature at Gawad Pambansang Alagad ni Balagtas. Noong 2000, hinirang din siya bilang isa sa 100 Artista na pinarangalan ng Cultural Center of the Philippines ng Centennial Honors for the Arts award.
Si Lee ang naglathala ng unang libro ng mga iskrip sa Pilipinas, ang Brutal/Salome. Naglabas din siya noong 1988 ng isang manwal sa pagsusulat ng iskrip, ang Trip to Quiapo, na naging isang bestseller at isang rekisitong teksto sa mga kursong pangkomunikasyon sa bansa. Ang iba pa niyang publikasyon ay ang mga sumusunod: Si Tatang at mga Himala ng Ating Panahon, isang antolohiya ng kanyang mga sanaysay, lathalain at ang iskrip ng Himala, na nagkamit ng CNN Award for Best Asia-Pacific Film of All Time noong 2009); Moral (iskrip), at; Pitik-Bulag sa Buwan ng Pebrero (dula). Nagwagi din ng Philippine National Book Award ang dalawang libro niya ng iskrip: Brutal/Salome (1981) at, kasama sina Jun Lana at Peter Ong Lim, Screenplay ng "Jose Rizal" (1999). Noong 2009, naglathala din siya ng ispesyal na edisyon ng mga librong Si Tatang... at Trip to Quiapo.
Noong Nobyembre 2008, inilabas niya ang kanyang unang nobelang Para Kay B (o kung paano dinevastate ng pag-ibig ang 4 out of 5 sa atin) na mainit na tinanggap ng mga mambabasa. Ang kanyang pangalawang nobela, Si Amapola sa 65 na Kabanata, ay matagumpay ring inilunsad noong Nobyembre 2011.
Mula pa noong 1982, nagbibigay din si Lee ng libreng scriptwriting workshop sa kanyang tahanan para sa mga nagsisimulang manunulat. Daan-daang scriptwriters na ang dumaan sa kanyang workshop at lumilikha na ng kanilang marka sa industriya ng telebisyon at pelikula. Noong 2000, kasama ng kanyang mga workshoppers, itinatag at pinamunuan ni Lee ang Writers Studio (ngayo'y Philippine Writers Studio Foundation) bilang daluyan ng pagkakaisa at pagtutulungan ng mga manunulat.
Sa kasalukuyan, nagtatrabaho si Lee sa ABS-CBN bilang Creative Manager at abala sa pagsusulat ng pangatlo niyang nobela.
Isinilang siya noong Marso 19, 1948 sa Daet, Camarines Norte.

Batayan sa Pagsulat ng Akda
Matagal nang gusto ni Ricky Lee na magsulat ng isang nobela dahil iyon talaga ang gusto niya. Ginawa niya ang nobela dahil ito ang unang isusulat niyang tungkol sa pag-ibig. Hindi sinabi ng may akda kung ano ang batayan. Pero para sa akin naging batayan dito ang mga tao sa paligid niya at maging sa ating lahat. Sa ngayon kung titgnan mo ang kapaligiran lahat ng tao ay may iba’t ibang kwento ng kanilang buhay pag-ibig ngunit sa dinami dami nilang nagmamahal iilan lang ang nagiging Masaya.
Layunin ng May Akda
Gusto ni Ricky Lee na mabasa siya ng mga iba’t ibang tao. Gusto niyang mabasa sya ng mga nakasakay sa MRT, nagbabantay ng ospital, nagpapatulog ng anak. Gusto niyang maikuwento sa lahat hindi lamang sa mga kapwa manunulat at mga nag-aaral ng literature.
Konklusyon
Sa nobelang ito mauunawaan natin kung bakit bihira lang ang nagiging masaya sa mundo. Ito ay ang dahilan na iilan lang ang napipili na maging maligaya depende sa kung paano niya ito panghahawakan. Magiging Masaya ka kung ipaglalaban mo ang pag-ibig na sa tingin mo ay nararapat para sa inyong dalawa ng iyong minamahal. Ang iba, iibig sa di sila iniibig. Iibig nang di natututo. O iibig sa wala. O di iibig kailanman. Lahat iba-iba at magkaiba sa bawat bagay. Magkaiba sa anyo at pag-uugali, ngunit lahat tayo pantay-pantay pagdating sa pag-ibig. Lahat tayo may karapatang umibig ng tama sa taong nararapat para sa atin.