Pilipino ang lahi mo! Ipagmamalaki mo ba? Kilala tayong mga Pilipino sa pagtutulungan ng bawat isa ano mang sakuna ang dumating. Kahit bundok o dagat ay hindi makahahadlang sa atin para hindi natin ma-ipaabot sa ating kababayan ang tulong na kanilang kinakailangan.

Batid sa kaalaman ng lahat ang pagpasok at pagpinsala ng isang bagyo noong Nobyembre 2013. Ito ay pinangalanang “Yolanda” sa ating bansa at may pandaigdigang pangalan na “Haiyan”. Ang bagyong Yolanda ay naitala na pinakamalakas na bagyo na tumama sa lupa na nakapinsala ng iba’t ibang lugar lalo na sa Cebu, Leyte, Tacloban, at marami pang iba.

Ganito ang kalagayan ng mga lugar na nasalanta ng Bagyong Yolanda nang puntahan ng mga tagapamalita - kalat-kalat na mga kahoy, wasak na mga bahay at establisimyento, naipong mga kalat sa tabi ng kalsada, naburang komunidad, nagkalat na mga katawan ng tao at mga alagang hayop, mga nakaligtas sa hagupit ng bagyo na iniligtas muli ang mga sarili laban sa gutom, mga sugat na hindi pa nagagamot, at walang mapagpapahingahang tirahan.

Libo-libo ang nasugatan, nawala, at namatay. Dahil na rin sa malakas na hangin at alon sa dagat ay nagsanhi ito ng pagbaha sa mga lugar na nasabi. Nagtumbahan din ang mga poste ng kuryente at mga linya ng komunikasyon. Nang dahil dito, nahirapan tumawag o magpahatid ng mensahe ang mga nasalanta sa mga pamilya nila sa ibang lugar. Na-ipahatid na lamang nila ang kanilang mensahe sa tulong ng mga reporter sa kanilang pagbabalita.

Ayon sa Kagawaran ng Ugnayang Panlabas (Department of Foreign Affairs), mayroong 23 na bansa ang nagpadala ng kanilang tulong para sa mga kababayan nating nasalanta ng bagyo. Ang mga bansa ay ang mga sumusunod: Australia, Belgium, Canada, China, Denmark, Finland, Germany, Hungary, Indonesia, Israel, Japan, Malaysia, The Netherlands, New Zealand, Norway, Russia, Singapore, Spain, Sweden, Turkey, United Arab Emirates, United Kingdom, at United States of America. Kabilang sa mga tulong na ito ang pagpapadala ng search-and-rescue teams and medical personnel, relief goods, medical supplies, pagpapagamit ng mga barko at eroplano, at cash donations. Labis ang pagkamangha nating mga Pilipino nang malaman natin ang pagtulong at pagsuporta ng iba’t ibang bansa para sa mga nasalanta. Lubos-lubos din ang pasasalamat natin sa kanila dahil ipinahatid nila ang kanilang tulong bagama’t hindi natin sila ka-lahi.

Dahil sa ipinakitang pagtulong ng iba’t ibang bansa, lalong nag-alab ang pagbabayanihan nating mga Pilipino. Kailanma’y hindi magpapahuli sa pagtutulungan ang ating lahi. Dumagsa ang tulong sa iba’t ibang mga eskwelahan, kompanya, foundations, at maraming pamilya dahil sa napanuod nilang kalalagayan ng mga nasalanta sa mga lugar sa kabisayaan. Ito man ay sa pamamagitan ng pera o materyal. Ang ating eskwelahan ay nagpahatid din ng tulong sa pamamagitan ng pangangalap ng salapi at ipinahatid sa isang malaking foundation na may kakayahang i-abot ang mga tulong sa mga nasalanta ng bagyo. Subalit hindi naging ganoon kadali ang pag-abot nila ng tulong sa mga nasalanta dahil sa sira-sira at mga nabahang mga daanan. Gayunpaman, hindi naging hadlang ang mga ito para hindi maibigay ang tulong sa mga nasalanta. Bagkus ay nag-udyok pa ito sa kanila para maipakita ang pagmamahalan ng Pilipino sa bawat isa. Marami ring mga Pilipino na naninirahan sa ibang bansa ang gumawa ng mga programa para makalikom ng pera at maipahatid dito sa Pilipinas. Kanya-kanyang istratehiya ang naisip ng mga Pilipino sa loob at labas ng bansa upang ipahatid ang pagtulong sa mga nasalanta ng bagyo.

Iyan ang Pilipino! Ano pa man ang bagyong dumating sa buhay, mararamdaman mong hindi ka nag-iisa sa pagbangon mo. Masasaktan at mahihirapan ka subalit mararamdaman mo pa rin ang pagmamahal ng iyong lahi. Hindi man sigurado ang pagtulong mula sa ibang bansa, pero ang tulong mula sa iyong bayan ay sigurado at ikaw ay makaka-asa. Pilipino ang lahi mo! Hindi dapat ikahiya, ipagmalaki mo!