Sa Pag-ahon ng Pilipino “Ang pangunahing bagay na kinakailangan sa bawat isang Pilipino ay… maging isang mabuting tao, isang mabuting mamamayan an tumutulong gamit ang kanyang ulo, kanyang puso at marahil ang kanyang mga bisig para sa ikatatagumpay ng bansa.” * Dr. Jose P. Rizal

Ang bayang Pilipinas ay bayang pinagpala ng Panginoon. Pinagpala sa maraming bagay gaya ng mga likas na yaman, ang mga nagtataasang kabundukan, luntiang kapatagan, malalawak na karagatan at dagat, mayayabong na kagubatan, na nagagamit sa pagtugon ng mga pangunahing pangangailangan ng mga Pilipinoat ng mga dayuhan sa maraming bansa. Pinagpala sa mayamang kultura at tradisyon sapagkat sa Pilipinas nanahan ang pinagsamang impluwensiya ng iba’t ibang bansa sa Kanluran, Asya at Silangan. Ito ang nagbibigay kulay ng natatanging pagkakakilanlan sa ating bansa an dapat naman talagang ipagmalaki. At higit sa lahat, pinagpala ang Pilipinas dahil sa mga Pilipino, sambayanang Pilipino na taglay ang kabayanihan at kapatiran, na may wastong pagpapahalaga, na may pusong mapagmahal at masayahin, at may marka ng tunay na kampeon. Sa maraming pagkakataon ay naipakita na ng mga Pilipino ang kanyang mga kahanga-hangang katangian. Nang ang bayan ay inalipusta at inapi ng mahabang panahon, isinilang ang mga bayaning nagpamalas ng nasyonalismo at nag-alay ng kanilang mga buhay para sa bayan. Pagiging bayani- ito ang katangian ng Pilipino na dapat ipagmalaki at isabuhay sa araw-araw. Sa paglipas ng panahon, taglay pa rin ng Pilipino ang mga yaman ng buhay, ito ay ang mga pagpapahalaga na nagmula pa sa mga ninuno natin at ipinasa sa bawat henerasyon. Sa pamamagitan nito, ang mga Pilipino’y nagtanim ng isang payapa at maayos na lipunan para anihin bilang isang mayabong na bansa. May pagpapahalaga- ito ang katangian ng Pilipino na dapat ipagmalaki at isabuhay sa araw-araw. Sa mga panahong ang mundo’y nalulumbay, ang mga dayuhan ay nakatagpo ng tahanan sa Pilipinas kasama ang mga Pilipino na may pusong mapagmahal, ngiting masayahin at mga bisig na may mainit na pagtanggap. Patunay lamang ito na ang Pilpino ay liwanag at kulay ng mundo. Sa kanilang pagkalinga sa iba, ang mundo’y napahanga. Pagkakaroon ng puso para sa lahat- ito ang katangian ng Pilipino na dapat ipagmalaki at isabuhay sa araw-araw. Sa paghahanap ng kahusayan sa maraming larangan napatunayan na rin ng Pilipino na kaya niyang makipagsabayan at magwagi sapagkat pinagkalooban siya ng Panginoon ng maraming talento, kakayahan at katalinuhan. Tunay na taglay niya ang tatak ng isang kampeon hindi lang sa iba’tibang larangan kundi pati na sa totoong buhay. Kampeon siyang maituturing dahil siya ay di sumusuko sa kahit anumang hamon ng buhay. Naniniwala siayng pagkatapos ng unos ay sisikat din ang panibagong umaga at naroon ang kanyang pag-asa para bumangong muli. Pagiging kampeon- ito ang katangian ng Pilipino na dapat ipagmalaki at isabuhay sa araw-araw. Nawa’y ang mga katangiang nabanggit ay magamit ng Pilipino sa pag-ahon. Sapagkat ang bawat isang Pilipino’y bahagi ng solusyon. Tayo na’t tahakin ang daan para sa pagbabago at sama-samang pag-unlad. Ito’y atin nang nasimulan noon, ating ipagpatuloy ngayon. Kaya natin Pinoy!