Ikaw ba ay isang lalaki na nagkakagusto rin sa kapwa lalaki? O kaya naman ay isang lalaki na gustong magsuot ng palda at ng mga kumukuti-kutitap na diamante? O kaya naman eh rumampa sa kalsada suot suot ang nagtatangkarang heels? Ngunit napipilitang itago na lamang ang nag-aalab na damdamin at kagustuhan dahil sa takot na baka ka alipustahin ng mga taong nakapaligid saiyo? Pwes, ang artikulong ito ay para sainyo.
Kung ikaw ay isang lalaki at tinamaan ka sa mga deskripsyon sa itaas, pwes alam mo na siguro kung ano ka. Oo, malinaw na malinaw; mas malinaw pa sa tubig ng Yawa river kung ano ka. No need to deny it girl, isa kang mermaid, isang SIRENA. Wag kang matakot kung ikaw ay nabibilang sa kanila, dahil hindi ka naman nagiisa. Marami kayo, tumingin ka lang sa paligid mo, left to right and right to left at kung sinisipag ka pa eh isama mo narin ang up and down at for sure makakakita ka ng kalahi mo.
Walang mali sa pagiging bakla, walang mali sa pagtanggap sa iyong sarili. Ang mali ay ang pagtago at pagtanggi mo sa sarili mong katotohanan at pag giit mo sa sarili mo na makamtan ang ikaliligaya ng iyong sariling buhay. Kung nais mong umibig sa kapwa lalaki eh di umibig ka, bakit kaylan ba naging kasalanan ang umibig at magmahal? Kung gusto mong magsuot ng palda eh di magsuot ka, bakit sino ba sila para diktahan ka ng damit na gusto mong isuot? Kung gusto mong rumampa gamit ang heels mong kulay pink eh di rumampa ka, just make sure na kaya mo dahil kung hindi, for sure subsob ang aabutin ng beauty mo girl.
Hindi mawawala ang mga taong aalipusta sayo dahil sa pagiging bakla mo pero hayaan mo lang sila, dahil gaya ng kasabihan, “We can’t please everybody”. Ano man ang gawin natin, masama man o mabuti, may masasabi at masasabi parin ang mga tao sa atin. Isipin mo na lang na nai-insecure lang sila sa kagandahan mong pang ilalim ng karagatan. Basta ba alam mo sa sarili mo na wala kang sinasaktan at naaapakan na tao, go lang ng go gurl! Rampa lang ng rampa. Kumembot ka na parang walang nakakakita sayo dahil tama man na “We can’t please everybody” eh ia-assure ko naman sayo na “We can please ourselves”. Gawin mo kung ano ang makakapagpaligaya sayo. Magpakasaya ka dahil lahat tayo, mapalalaki, babae, bakla, tomboy, o kung ano ka pa man ay may karapatan na lumigaya.
Masaya ang maging bakla. Oo, minsan mahirap pero lahat naman ng tao eh dumadaan sa hirap ‘di ba? Kaya kung ako sayo, lumabas ka na diyan sa klosetang matagal mo ng tinitirahan at tinataguan dahil hindi mo makakamit ang tunay na saya ng buhay kung palagi ka na lamang magtatago at iiwas sa mga mapanghusgang mata ng lipunan. Ipagmalaki mo ang sarili mo kung ano ka pa man, ipakita mo sa mundo na hindi hadlang ang pagiging bakla para lumigaya at umasenso sa buhay. Ipakita mo sa kanila na kahit bakla ka man eh kaya mo rin makipagsabayan sa iba sa pagharap sa mga alon ng buhay.