KABANATA I INTRODUKSYON

Ang pagpili ng kurso sa kolehiyo ay hindi parating madali para sa mga estudyanteng magtatapos pa lamang ng pag-aaral sa sekondarya. Maraming maaaring pagpilian at kadalasan ito ang nagiging sanhi ng kalituhan para sa mga mag-aaral na tatahak ng higit na mataas na antas ng karunungan. Dahil dito, nagkakaroon ng maraming kabiguan sa pag-aaral na dala rin marahil ng agarang pagdedesisyon sa isang bagay. Sa kabilang dako, ang pagpapatuloy ng kursong edukasyon ay makapagpapalago sa mga darating pang mga pag-aaral para sa propesyonal at personal na mga rason. Ang mga kadahilanan din ng isang tao ang makapagsasabi kung ipagpapatuloy niya pa ang kursong Edukasyon (www.christianet.com/education). Kung kaya ang pag-iisa ng mga interes at kagalingan ng bawat estudyante ay may malaking puwang sa pagpili ng kursong kukunin sa kolehiyo. Ang kursong edukasyon ay isa sa mga bihirang kunin ng mga magsisipagtapos na mag-aaral sa sekondarya. May kani-kanyang dahilan, pangunahing kaalaman, at pagproseso sa isipan ang bawat isa, sa katayuan bilang isang guro kung sila ay tatahak ng kursong ito. May mga positibo at negatibong pananaw ang bawat isa. Ayon kay Laurente (2008), isang edukador, mataas ang posibilidad na hindi umasenso sa pinansiyal na aspeto ang isang guro dahil sa mababa ang sahod sa larang na ito. Maaaring ganito ang karaniwang sitwasyon sa bansang Pilipinas subalit mayroon pa ring naniniwala sa kagandahang dulot ng kursong ito lalo na sa naiaambag ng isang guro sa kabuuang pagkatao ng isang indibidwal. Naibahagi ni Transona (2002) na ang isang guro ay isa sa mga pinakamahalagang tauhan sa isang institusyon sa pag-aral higit sa ano pa mang mga kurso. Nakasalalay din sa mga guro ang pag-usad ng mga malilikhaing gawain na posibleng matamo ng mga mag-aaral. Sa artikulo ni Abeliade et. al (1995), kanyang ibinahagi na ang pinansyal na kasiguraduhan ay isang mahalagang salik sa pagpili ng kurso. Hindi rin alintana ang malaking ginagampanan sa pagdedesisyon ng mga taong nakapaligid sa mga magsisipagtapos ng sekundarya maging ang hatak ng mga kursong sa palagay ng nakararami ay makapagbibigay ng green pasture. Sa panahon ng kabataan higit na naipapamalas ng mga kamagulangan ang kanilang pag-aalala sa kahihinatnan ng kanilang mga anak. Kung sakali man na may kabiguang mangyari sa anak, mabigat na dalahin ito para sa kanila ayon kay Santrock (2005). Dahil dito, malaking bahagdan ng mga magulang ang nagnanais na pakuhain ang kanilang mga anak ng mga kursong in-demand. Sa kabila nito, inilagay ni Duriez et. al (2007) na kailangan pa rin ng mga magulang na maging maingat sa pagbibigay ng kanilang mga ekspektasyon sa kanilang mga anak. Higit na kaaya-aya kung paiigtingin nila ang kapabilidad na magbigay suporta at positibong pananaw sa kanilang mga anak.
May ilan pa rin na kumukuha ng mga kurso at aralin sa antas kolehiyo sa kadahilanang hilig nila ito. Sa lahat ng ito, malaking puwang pa ring maituturing ang personal na persepsyon at pagdedesisyon ng isang magtatapos sa pagtahak ng kanilang kakaharaping karera sa buhay. Sa aklat ni Santrock (2005), kanya ritong inilahad na ang mga kabataan ay talagang nasa panahon ng paghanap ng kanilang tunay na sarili o pagkatao.
Sa kasalukuyang panahon na may pagbabago-bago ang bilang ng mga may nais kumuha ng kursong Edukasyon, minarapat lamang tuunan ng pansin ang karaniwang mga paniniwala na nagmumula sa mga kabataan. Dahil sa karamihan ng mga papasok sa kolehiyo ay mga kabataan, ninais ng mga mananaliksik na alamin ang persepsyon sa kursong Edukasyon ng mga estudyanteng magtatapos sa paaralan ng Naga City Science High School, akademikong taon 2008 -2009.

Paglalahad ng Suliranin Ang pangunahing layunin ng pag-aaral na ito ay ang malaman at masuri ang mga pananaw sa kursong edukasyon ng mga mag-aaral na magsisipagtapos sa Naga City Science High School, akademikong taon 2008 – 2009. Hangarin ng pag-aaral na ito na masagot ang mga sumusunod na tiyak na katanungan: * Anu-ano ang mga pananaw ng mga mag-aaral sa kursong edukasyon? * Anu-ano ang mga salik na nakaaapekto sa pananaw ng mga mag-aaral sa kursong edukasyon? * Ilang porsyento ng mga mag-aaral ang nagbabalak kumuha ng kursong Edukasyon pagtungtong sa kolehiyo?

Kahalagahan ng Pag-aaral Ang pananaliksik na ito ay naglalayong makatulong sa mas malawak na pag-unawa sa kursong edukasyon ng mga sumusunod: Mga Mag-aaral sa hayskul. Karaniwang nagiging suliranin ng mga mag-aaral sa sekondarya ang pagpili ng kursong kanilang kukunin pagdating sa kolehiyo. Sa pag-aaral na ito maaaring magkaroon ng paunang kaalaman ang mga magsisipagtapos sa kung ano ang mga karaniwang paniniwala sa kursong edukasyon. Magiging malaking tulong din ang pag-aaral sa mga nagbabalak kumuha ng kursong ito. Mga magulang. Maaaring magkaroon ng katiyakan ang mga magulang na nagnanais pakuhanin ng kursong edukasyon ang kanilang mga anak. Magsisilbi ring basehan ang pag-aaral na ito sa sa mga kamagulangang nag-iisip din kung ano ang nababagay na kurso para sa kanilang mga anak. Hindi nais ng mga mananaliksik na kumbinsihin ang mga magulang na paboran o ayawan ang kursong edukasyon, kundi, sa pamamagitan ng ganitong pananaliksik ay higit na malinawan ang sinumang tutuntong sa mas kumplikadong pag-aaral sa kolehiyo. Mga guro. Makakaambag ito sa malawak na kaalaman ng mga guro sa propesyong kasalukuyan nilang ginagampanan. Makatutulong sa kanila ang pananaliksik na ito sa pamamagitan ng pagbabahagi ng mga pangunahing kaalaman patungkol sa nasabing kurso. Maari nilang mamulat ang mga kaisipan ng kanilang mga mag-aaral na kasalukuyang nagsusuri sa papasukan nilang kurso sa kolehiyo. Mga administrador ng paaralan. Makatutulong ang pananaliksik sa pagbuo ng mga konsepto at mga programa na maghihikayat sa mga mag-aaral na kunin ang kursong edukasyon. Maaari rin itong makatulong upang makagawa ang mga administrador ng mga paraan upang makakita ng mga estratehiyang makakapagpabago sa maling paniniwala ng mga kabataan ukol sa kursong edukasyon.

Saklaw at Katakdaan ng Pag-aaral Nakapokus ang pananaliksik sa paglalarawan at pagsuri ng mga persepsyon ng mga mag-aaral sa kursong Edukasyon. Ninanais din na ipaliwanag ng pag-aaral ang mga dahilan kung bakit bihirang piliin ng mga mag-aaral ang naturang kurso. Kasama na rin dito ang pag-alam sa iba’t ibang mga salik na nakaaapekto sa kanilang persepsyon at pagdedesisyon. Ang mga respondyante o tagatugon ng pananaliksik ay mga mag-aaral ng Naga City Science High School na nasa ika-apat na taon. Isang seksyon lamang sa ikaapat na taon ang pagtutuunan ng sarbey. Ang IV-Ohms ang napili ng mga mananaliksik sa istatistikal na pamamaraan. May bilang na apatnapung mag-aaral (40) ang total na populasyon ng seksyong Ohms. Ginawa ang pananaliksik sa Naga City Science High School sa taong akademiko 2008 – 2009 kaya’t hindi na sakop ng pananaliksik ang pagbabago sa persepsyon ng mga mag-aaral patungkol sa kursong Edukasyon. Hindi rito tinatalakay ang mga karaniwang persepsyon ng mga guro at magulang. Ninanais lamang ng pag-aaral na ito na alamin ang mga pananaw ng mga ordinaryong mag-aaral na papasok sa kolehiyo kung saan ang mga nalikom na datos ay maaaring magbigay linaw o dagdag na kaalaman patungkol sa kanilang pananaw sa kursong edukasyon.

Katuturan ng mga Talakay Sa higit na ikauunawa sa paksang tinalakay ay binigyang kahulugan ang ilang mga terminolohiya ayon sa pagkakagamit nito sa naturang pag-aaral: 1. persepsyon - pag-unawa sa kursong edukasyon at kinasasakupan nito sa pamamagitan ng mga pandama o pag-iisip. 2. media – ito ay tumutukoy sa mga kagamitang panteknolohiya at mga produkto nito na nakapagbibigay impluwensiya sa persepsyon ng tao ukol sa kursong edukasyon. 3. positibong pananaw – ang pagkakaroon ng mabuting posisyon ng kaisipan ukol sa kursong edukasyon. 4. negatibong pananaw – ang pagkakaroon ng di-mabuting posisyon ng kaisipan ukol sa kursong edukasyon. 5. estratehiya – isang plano o pamamaraan para makamit ang isang partikular na adhikain o mithiin. 6. larang - ito ay gawain o interes na sakop ng isang particular na propesyon 7. pangkalahatang kaisipan – ito ay tumutukoy sa ideyang pangkabuuan ng mga tao o isang grupo ukol sa kursong edukasyon |

Teoryang Saligan ng Pag-aaral
FUNSIYONALISTA
Sa konseptong funsiyonalista na ipinaliwanag ni Wilson at Hayes (2000) , tinitingnan ang mga organisasyon ng mga kongkretong realidad na umiiral hiwalay sa personal o sosyal na pagkakabuo ng mga ito, ito ay ipinaaalm sa pamamagitan ng larang ng sosyolohiya na nagtitiyak ng stabilidad, sosyal na kaayusan, integrasyon at solidaridad. Ang konseptong funsiyonalista rin ay naglalayong makapagbigay ng rasyonal na mga pagpapaliwanag ng mga sosyal na gawain at may pag-aalala sa paghahatid ng mga praktikal na solusyon sa mga praktikal na problema. Sa pangkalahatan, ninanais nito na magkaroon ng isahang pananaw tungo sa kakayahan, pag-iirinagn at mga interes upang makaabot sa mataas na antas ng pagiging epektibo at produktibo na maaaring makamit ng isang indibidwal. Ang konseptong funsiyonalista ay may kalakip na dalawang teorya na maaaring tumukoy sa kakayahan ng guro na magturo sa pamamagiatn ng pagiging isang epektibong namumuno sa loob ng klase, at ang pagpili ng karera o propesyon na umaagpang sa hininging mga batayan ng pangangailangan ng taong magdedesisyon. An una ay ang teoryang transaksyonal. Ito ay umiikot sa pagkaunawa na ang pamumuno ay isang porma ng sosyal na pagpapalitan sa pagitan ng mga namumuno at pinamumunuan. Ang namumuno ay masasabing epektibo kung nagagawa niyang hikayatin ang kanyang nasasakupan na gawin ang anumang kanyang ipinagagawa upang makamit ang organisadong mga layunin. Hindi lamang motibasyon ang kinakailangang may mataas na antas sapagkat ang moralidad ay isa pang karagdagan sa pagiging epektibo ng mga namumuno. Nakapaloob sa teoryang contingency ang prinsipyo na ang pagiging isang epektibong namumuno o lider ay kailangang may pag-aagpang sa mga gawi-gawi at estilo sa bawat sitwasyon. Sa ikalawang teoryang ito, ang mga sitwasyonal na salik na nangangailangan ng pagbabatay ay ang mga sumusunod: ang natura nga gawin, kalidad ng relasyon sa pagitn ng lider at mga miyembro ng grupo, at ang kabuuang awtoridad na mayroon ang lider sa ibabaw ng domeyn ng gawain. Nais ng mga mananaliksik na pagbatayan ang mga teoryang ito sa pagbibigay ng mas malawak na pagpapaliwanag at pagsuporta sa mga impormasyong makakalap sa sarbey. Partikular na mabibigayan tuon ng mga ito ang pananaw ng mga mag-aaral patungkol sa mga guro sa pagiging epektibo sa pagtuturo, at maging din ang pag-aangkop ng desisyon sa kursong kukunin sa kolehiyo ng mga magsisipagtapos na mga mag-aaral ng Naga City Science High School, taong panuruan 2008-2009.