_____________________________________________________________________
Mga Epekto ng Pagkahumaling sa mga Gadyet sa Pag-aaral ng mga Estudyante ng Unibersidad ng San Jose- Recoletos (USJR) ng Ikalawang Semestre ng Panuruang Taon 2013-2014
______________________________________________________________________

Ipinasa nina:
Colina, Mae P.
Ediza, Amiel M.
Jotojot, Jesha Carl C.
Molina, Shella Maye
Pepito, Charmine

Ipinasa kay:
G. Charle Magne Gomez

KABANATA 1
Ang Suliranin at ang Saklaw Nito
Panimula
Mula pa man noon, tayong mga tao ay patuloy na sa pag-imbento ng mga bagay na makakatulong sa atin sa araw-araw upang tayo ay mamuhay ng maginhawa at matiwasay. Ang pag-imbento natin ng mga bagay-bagay ay nagsimula pa noong Panahon ng Bato kung saan ang ating mga ninuno ay gumawa ng mga kasangkapang gawa sa bato na kanilang ginagamit sa pangangaso. Kahit na lumipas pa man ang daan-daang mga taon, ang mga tao ay patuloy pa rin sa pag-iimbento sa tulong ng makabagong teknolohiya na nalinang sa pagdaan ng mga panahon. Dala ng napakabilis na pagsulbong ng teknolohiya, tayo ngayon ay nakararanas ng napakabilis na modernisasyon na makikita natin sa halos lahat ng aspeto ng ating mga buhay.
Sa pagpasok ng makabagong panahon, kailangang ibagay rin nating mga tao ang uri n gating pamumuhay. Kailangan ng madalas na inobasyon upang matugunan ang ating mga pangangailangan lalo na ng henerasyong naisilang kasabay ang panahong ito. Ang makabagong teknolohiya ay sinimulan nang isama sa sistema ng edukasyon. Ito ay makikita sa paggamit ng teknolohiya sa pagtuturo sa mga paaralan. Kung noon ay mga manila paper ang ginagamit, ngayon ay mas ginagamit na ng mga guro ang powerpoint para sa mas mabisang pagtuturo. Malayo na nga ang narating ng teknolohiya. Isa sa mga nagging bunga ng makabagong teknolohiya ay ang mga ginagamit nating mga gadyet. Sinasaklaw nito ang mga cellphone, computer, tablet, PSP, music players at telebisyon. Mula sa mga simpleng walkman at CD player noon, tayo ay mayroon na ngayong iba’t ibang disenyo at porma ng mga gadyet na ito – inihulma batay sa ating kagustuhan at badyet. Dahil sa pag-unlad ng internet at ng pagsulpot ng napakaraming mobile applications, mas dumarami na ang nagiging pakinabang ng mga gadyet. Ang mga ito ay hindi lang nagdudulot sa atin ng kasiyahan; ang mga ito ay nagiging katuwang na rin natin sa paggawa ng mga importanteng bagay at nakakapagpagaan sa ating buhay araw-araw.
Tunay na napakarami na nga ng pakinabang ng mga gadyet lalo na para sa mga mag-aaral. Ang mga ito ay hindi lang natin ginagamit upang tayo ay malibang. Ngayon, ginagamit na rin natin ang mga gadyet sa pananaliksik, paggawa ng mga takdang-aralin, pagkuha ng mga larawan ng mga lab specimen, o pag-rekord ng mga diskusyon ng ating mga guro. Ang mga makabagong gadyet na ito ay nagiging daan din upang mas mapabuti pa ng mga munting bata ang kanilang pag-eensayo sa pagbabasa dahil sa tulong ng biswal na presentasyon; mas nagkakaroon sila na ideya kung ano talaga ang anyo ng mga paksa sa totoong buhay. Dahil din sa mga gadyet, tayo ay nagkakaroon ng komunikasyon sa mga mahal natin sa buhay na nasa malalayong lugar at ito ay nagiging tulay natin upang makipag-ugnayan at malaman kung ano na ang nagyayari sa ibang panig ng mundo. Hindi natin maipagkakailang ang mga gadyet ay naging karugtong na ng ating mga buhay lalo na ng mga kabataang namulat sa kasalukuyang modernong panahon. ang kanilang ginagawa. Ang mga ito ay laging dala-dala ng bawat kabataan kahit saan man sila magpunta at kahit ano pa man ang kanilang ginagawa. Ang mga gadyet ay hindi nila binibitawan kahit na kumakain, umiinom, nasa klase, at kahit na sa pagtulog. Ang mga gadyet na ito ay masasabing naging pangangailangan na ng bawat tao. Mapapansing ang mga ito ay hindi mawawala sa bawat kabataan o pamilya. Ito ay masasabing naging katumbas na ng hangin na kung mawawala ay hindi na tayo maaring mabuhay.
Masasabing ang kanilang mga buhay ay umiikot na lamang sa kanilang mga gadyet. Noong panahon ng ating mga magulang kung kalian hindi pa ganoon kayabong ang teknolohiya, ang mga mag-aaral ay masipag na pumupunta sa mga silid-aklatan upang magsaliksik. Kahit na sila ay walang ginagamit na computer o wifi, nakakakuha pa rin sila ng matataas na mga marka sa paaralan. Sila ay pursigidong mag-aaral kahit na wala ang tulong ng makabagong teknolohiya na ating ginagamit ngayon. Samantala, ang mga kabataan ngayon ay umaasa na lamang sa makabagong teknolohiya. Marami sa mga kabataan ngayon ang hindi na nag-iisip at hinahanap na lang sa Google ang mga kasagutan sa kanilang mga katanungan Ang matindi ring pagkahumaling sa mga gadyet ay nakakaabala sa konsetrasyon ng mga kabataan. Ang kanilang atensyon ay nahahati. Sa halip na ang oras ay gugulin nila sa pag-aaral at sa iba pang makabuluhang mga bagay, sila ay natutuksong mag-Facebook, ma-text o maglaro gamit ang kanilang mga gadyet.
Ang pag-aaral na ito ay gagawin upang malaman kung tunay bang nakaaapekto ang paggamit ng mga gadyet sa pag-aaral ng mga estudyanyte nbg Unibersidad ng San Jose-Recoletos. Kung ito nga ay nakaaapekto, nilalayon din ng pag-aaral na ito na matukalsan ang iba’t ibang epekto ng sobrang paggamit ng mga gadyet sa kanilang pag-aaral. Ang pananaliksik na ito ay naglalayong maging daan upang malaman kung may nadudulot ba na mabuti ang paggamit ng mga makabagong teknolohiya o kung ito ba ay nakakasama lang sa pag-aaral ng mga estudyante.
Batayang Teoretikal Ang mga gadyet ay naging isang mahalagang parte na nga ng ating mga buhay lalo na ng sa buhay ng mga kabataan. Ayon sa ginawang pag-aaral ng Pew Research Center, 84% sa mga batang nasa Amerika mula edad 12 pababa ay nagmamay-ari na ng mga cellphone. Samantala, ang mga kabataang nasa edad 15-18 ay gumugugol ng isang oras at 51 minuto bawat sa pagte-text habang ang mga kabataang nasa edad 11-14 naman ay gumugugol ng isang oras at 13 minuto bawat araw. Mula rin sa kanilang pag-aaral ay napag-alaman din nilang ang mga kabataang nasa 18 taong gulang pababa ay nakakatanggap ng 2,779 text messages sa kanilang mga cellphone kada buwan at sangkapat (1/4) naman sa mga mensaheng ito ay pinapadala ng mga kabataan habang nasa klase. Ipinapakita lamang nito ang matinding pagkagiliw ng mga kabataan sa mga gadyets, particular na ng sa cellphone, na kahit na sa oras ng pakikinig sa klase ay hindi nila mapigilan ang kanilang mga sarili sa pagte-text. Ayon naman kay Mark McCrindle, isang social analyst, ang mga Australyanong nasa edad 19-33 ay gumugugol ng 10 oras at 21minuto bawat araw sa paggamit ng kanilang mga internet, telebisyon, smartphones, computer games at tablets. Ayon din kay McCrindle na nagkaroon ng napakalaking pagtaas ng oras ng ginugugol sa paggamit ng teknolohiya ang mga tao. Mula sa parehong pag-aaral na kanyang ginawa noong 2008, tumala lamang ng 8 oras ang paggamit ng mga taong nasa edad 19-33 sa kanilang mga gadyet. Ito ay kanyang iniugnay sa pagsulpot ng napakaraming mga computer games at mobile applications na mas nakakapagpahumaling pa sa mga tao. Iminungkahi pa niya na sa loob lamang ng limang taon, mas tataas pa ang mga numero. Sa isang artikulo na inilathala ng Mail Online, isang online news site, isinasaad na mas malaki pa ang oras na ating ginagamit para sa ating mga gadyet kumpara sa oras na ating ginagamit upang makasama ang ating mga karelasyon. . Ang isang tao ay gumugugol ng humigit-kumulang dalawang oras kasama ng kanyang cellphone habang gumugugol lamang ng 97 minuto o isang oras at 37 minuto kasama ang kanyang nobyo o nobya. Isinasaad din sa artikulo na mas nahuhumaling tayo sa ating mga gadyet dahil ang mga ito ay idisenyong magtaglay ng lahat ng katangiang hinahanap at kinakailangan natin. Ang ibang kasangkapan natin sa bahay ay ipinagpapalit na natin sa ating mga cellphone sapagkat ang mga katangiang tinataglay ng mga iyon ay mahahanap na sa mga smartphones. 57% sa atin ang umaming wala na silang mga alarm clock sa bahay sapagkat makikita na ito sa mga smartphones. Kalahati sa atin ang hindi na rin nagsusuot ng relo habang 46% naman sa atin ang mas gusto ang kumuha ng mga larawan gamit ang kanilang mga smartphones. 25% naman ang mas gusto ng smartphones kumpara sa laptop habang 12% naman ang ayaw na sa mga game consoles tulad ng playstation at PSP. Ayon naman sa ginawang pananaliksik ng International Centre for Media & the Public Agenda (ICMPA) at ng Salzburg Academy on Media & Global Change na pinamagatang ‘The World Unplugged’, halos lahat ng mga mag-aaral na kanilang pinasubukang hindi gumamit ng kahit anong social networking site o kahit anong anyo ng teknolohiya sa loob ng 24 oras ay hindi nakayanan ang pagsubok. Nalaman nila na 80% sa kanilang mga tagatugon ang nakaranas ng mental at pisikal na pagkabalisa, pagkataranta at pagkalito nang pinilit silang hindi gumamit ng kahit anong anyo ng teknolohiya. Nahinuha nilang ang mga mag-aaral ay talagang nahumaling na sa makabagong teknolohiya tulad ng mga mobile phones, laptops, telebisyon at maging sa mga social networking sites tulad ng Facebook at Twitter.

Mga Kaugnay na Pag-aaral Tungkol sa Labis na Pagkagiliw ng mga Mag-aaral sa Teknolohiya

Guhit 1
Balangkas Teoretikal

SULIRANIN
Paglalahad ng Suliranin
Layunin ng pag-aaral na ito na tuklasin ang iba’t ibang epekto ng pagkahumaling sa makabagong teknolohiya ng mga mag-aaral Unibersidad ng San Jose-Recoletos (USJR) ng ikalawang semestre ng Panuruang Taon 2013-2014 sa kanilang pag-aaral.
Upang maging makabuluhan ang pag-aaral na ito, naglalayon din itong sagutin ang mga tiyak na katanungan: 1. Anu-ano ang iba’tibang dahilan kung bakit nahuhumaling ang mga mag-aaral sa makabagong teknolohiya? 2. Sa kabuuan, ilang oras ang ginugugol ng bawat mag-aaral kasama ang kanilang mga gadyet at mas malaki ba ito sa oras na kanilang ginugugol sa pag-aaral? 3. May direktang ugnayan ba ang oras na ginugugol sa paggamit ng makabagong teknolohiya sa pag-aaral ng mga estudyante? 4. Anu-ano ang mga mabubuting epekto ng paggamit ng mga gadyet sa pag-araal ng mga estudyante? 5. Anu-ano ang mga masasamang epekto ng paggamit ng mga gadyet sa pag-araal ng mga estudyante? 6. Sa anong ibang mga aspeto pa ng buhay ng mga mag-aaral nakakaapekto ang kanilang paggamit ng makabagong teknolohiya?