പുനത്തിൽ കുഞ്ഞബ്ദുള്ള രചിച്ച നോവലാണ് സ്മാരകശിലകൾ. നോവൽ സാഹിത്യത്തിനുള്ള 1978-ലെ കേരള സാഹിത്യ അക്കാദമി അവാർഡും 1980-ലെ കേന്ദ്ര സാഹിത്യ അക്കാദമി അവാർഡും ലഭിച്ച കൃതിയാണിത്.[1]പുനത്തിലിന്റെ മികച്ച കൃതിയായി സ്മാരകശിലകൾ കണക്കാക്കപ്പെടുന്നു.[2] വടക്കൻ മലബാറിലെ സമ്പന്നമായ അറയ്ക്കൽ തറവാടും അതിനെ ചുറ്റിപ്പറ്റിയുള്ള ഒരു വിഭാഗം ജനങ്ങളുടെയും കഥയാണ് ഈ നോവൽ പറയുന്നത്. ഖാൻ ബഹദൂർ പൂക്കോയ തങ്ങൾ, കുഞ്ഞാലി, പൂക്കുഞ്ഞീബി ആ‌റ്റബീ തുടങ്ങിയവരാണ് പ്രധാന കഥാപാത്രങ്ങൾ. ഈ നോവലിന് അവതാരിക എഴുതിയത് പ്രശസ്ത സാഹിത്യകാരൻ കോവിലൻ ആണ്.
കേരള സാഹിത്യ ചരിത്രത്തില്‍ ഒരു സ്മാരകശിലയാകുകയാണ് പുനത്തില്‍ കുഞ്ഞബ്ദുള്ളയുടെ ‘സ്മാരക ശിലകള്‍’. കേരള സാഹിത്യ അക്കാദമി അവാര്‍ഡും കേന്ദ്ര സാഹിത്യ അക്കാദമി അവാര്‍ഡും ലഭിച്ച നോവലിന്റെ 65000ല്‍ അധികം കോപ്പികളാണ് ഇതിനകം വിറ്റഴിഞ്ഞിരിക്കുന്നത്. 1977ല്‍ പുറത്തിറങ്ങിയ ഈ നോവലിന്റെ ആദ്യ ഡി.സി പതിപ്പ് പുറത്തിറഞ്ഞിയത് 1993ലാണ് . നോവലിന്റെ 19ാം പതിപ്പാണ് ഇപ്പോള്‍ പുറത്തിറങ്ങിയിരിക്കുന്നത്.
അതിപുരാതനവും തകര്‍ച്ചയുടെ വക്കിലെത്തിയതുമായ ഒരു പള്ളിയും പള്ളിക്ക് ചുറ്റുമുളള മനുഷ്യ ജീവിതങ്ങളുടെ കഥകളുമാണ് ‘സ്മാരക ശിലകള്‍’ പറയുന്നത്. മനുഷ്യരേയും പ്രകൃതിയേയും ചൂഴ്ന്നു നില്‍ക്കുന്ന ഒട്ടനവധി കെട്ടുകഥകള്‍ എല്ലായിടത്തുമുണ്ട്. അത്തരം മിത്തുകളെ പൊലിപ്പിച്ച് നോവലിന്റെ രൂപഭംഗി കൂട്ടാന്‍ മനപ്പൂര്‍വ്വമായ ഒരു ശ്രമവും നടത്താന്‍ പുനത്തില്‍ സ്മാരക ശിലയില്‍ ശ്രമിച്ചിട്ടില്ല. ഏതു മനുഷ്യനും ഇതിഹാസവല്‍കരിക്കുന്ന പ്രവണത എല്ലായിടത്തുമുണ്ട്. എന്നാല്‍ കെട്ടുകഥകളെ ജീവിത ഗന്ധിയായ കഥകളാക്കി മാറ്റുകയാണ് പുനത്തില്‍ ഇവിടെ ചെയ്തിരിക്കുന്നത്.
ഖാന്‍ ബഹദൂര്‍ പുക്കോയ തങ്ങളാണ് നോവലിലെ പ്രധാന കഥാപാത്രം.അദ്ദേഹത്തിന് ചുറ്റുമുള്ള ജീവിതങ്ങളുടെ കഥയാണ് നോവലില്‍. ഖാന്‍ ബഹദുര്‍ പൂക്കോയ തങ്ങള്‍ക്ക് ചുറ്റും കറങ്ങുന്ന ജീവിതങ്ങളാണെങ്കിലും മറ്റ് കഥാപാത്രങ്ങള്‍ക്ക് അവരുടേതായ ഇടം നോവലില്‍ നല്‍കാന്‍ പുനത്തില്‍ ശ്രമിച്ചിരിക്കുന്നു. മറ്റ് ആധുനിക നോവലുകളില്‍ കാണപ്പെടുന്നപോലെ വളച്ചുകെട്ടലുകള്‍ ഒന്നുമില്ലാത്ത ആഖ്യാന ശൈലിയാണ് ഈ നോവലില്‍ പുനത്തില്‍ സ്വീകരിച്ചിരിക്കുന്നത്. നോവലില്‍ ഒരു കഥാപാത്രവും മഹത്വവല്‍ക്കരിക്കപ്പെടുന്നില്ല. എന്നാല്‍ ഓരോ കഥാപാത്രത്തിനും അവരുടേതായ സ്ഥാനം ഉണ്ടുതാനും.
‘പൂക്കോയ തങ്ങള്‍ ഇതിഹാസമാനമാര്‍ന്ന കഥാപാത്രമാണ്. നിഗ്രഹാനുഗ്രഹശേഷിയുള്ള ഒരു ഫ്യൂഡല്‍ കര്‍ത്തത്വമായാണ് ആ കഥാപാത്രം ഉദ്ദേശിക്കപ്പെട്ടിട്ടുള്ളത്. അധികാരപ്രമത്തതയും വിഷയലമ്പടത്വവും പ്രകടിപ്പിക്കുന്ന നിഷ്ഠൂരനായ ഒരു ഫ്യൂഡല്‍ പ്രഭുവിന്റെ അടയാളങ്ങളത്രയും പൂക്കോയത്തങ്ങളില്‍ കണ്ടെത്താനാകും.’ എന്നാണ് നോവലിനെക്കൂറിച്ചുള്ള പഠനത്തില്‍ എന്‍.ശ്രീധരന്‍ പറഞ്ഞിരിക്കുന്നത്. നീലിയെന്ന സ്ത്രീയുടെ അച്ഛനാരാണന്നറിയാത്ത കുട്ടിയെ കുഞ്ഞാലിയെന്ന് പേരിട്ട് സ്വന്തം മകള്‍ പൂക്കുഞ്ഞിക്കൊപ്പം അറയ്ക്കള്‍ തറവാട്ടിലെ ഒരംഗത്തെപ്പോലെ വളര്‍ത്തുന്ന പൂക്കോയത്തങ്ങളുടെ മനസ്സ് മനുഷ്യവ്യാപാരങ്ങളുടെ സങ്കീര്‍ണ്ണതകളെക്കുറിച്ച് നോവലിസ്റ്റിനുള്ള ആഴമേറിയ തിരിച്ചറിവാണ് സാക്ഷ്യപ്പെടുത്തുന്നതെന്നും എന്‍. ശ്രീധരന്‍ തന്റെ പഠനത്തില്‍ പറയുന്നു.
പുനത്തിലിന്റെ മനുഷ്യത്വപരമായ മുഖം വെളിവാക്കുന്ന ഒട്ടനവധി മുഹൂര്‍ത്തങ്ങളുംനോവലിലുണ്ട്. നോവലിലെ നിര്‍ദ്ദനരും അധസ്ഥിതരുമായ കഥാപാത്രങ്ങള്‍ ഇതിന് ഉദാഹരണങ്ങളാണ്. ജീവിതത്തിന്റെ സമസ്ത മേഖലകളിലും മനുഷ്യ ദൈന്യതയുടെ ആഴം അന്വേഷിക്കുന്ന സവിശേഷമായ സര്‍ഗ്ഗാത്മക മനസ് പുനത്തിലിനുണ്ട്. അറയ്ക്കല്‍ തറവാടിന് ചുറ്റുമായി കഴിഞ്ഞു കൂടിയിരുന്ന നിരാലംബരായ മനുഷ്യരോടുള്ള പുനത്തിലിന്റെ സഹാനുഭൂതി തന്നെയാണ് മറ്റ് കൃതികളില്‍ നിന്ന് സ്മാരക ശിലകളെ വേറിട്ട് നിര്‍ത്തുന്നത്.
‘ആധുനികതയുടെ കാലത്ത് എഴുതപ്പെട്ട നോവലുകളില്‍ പലതും ഇന്നത്തെ വായനയില്‍ രണ്ടാംകിട കൃതികള്‍ മാത്രമാണ്. സ്മാരക ശിലകള്‍ ഈ അര്‍ത്ഥത്തില്‍ ആധുനികതയെ അതിജീവിച്ച രചനയാണ്. ഉമ്മാച്ചുവിന്റെയും അസുരവിത്തിന്റെയും തായ്‌വഴിയില്‍ പിറന്ന കാലത്തെ അതിജീവിക്കുന്ന നോവല്‍ ‘ എന്ന് പറഞ്ഞാണ് എന്‍ ശശിധരന്‍ തന്റെ പഠനം അവസാനിപ്പിക്കുന്നത്. അതെ സ്മാരക ശിലകള്‍ കാലത്തെ അതിജീവിക്കുന്ന അതുല്യ സൃഷ്ടിയാണ്.
Other reviews
മനുഷ്യ ജീവിതത്തിന്റെ ആത്യന്തികമായ വ്യര്‍ത്ഥതയെക്കുറിച്ചും, മരണത്തിന്റെയും ശൂന്യതയുടെയും സങ്കീര്‍ണ്ണതകളെക്കുറിച്ചും ഒരേ സ്വരത്തില്‍ വാചാലരായ സമകാലികരില്‍നിന്നും ചരിത്രപരമായി വേറിട്ടുനില്ക്കുന്ന പുനത്തില്‍ കുഞ്ഞബ്ദുള്ളയുടെ സര്‍ഗ്ഗാത്മകവ്യക്തിത്വം അതിന്റെ ഏറ്റവും സഫലമായ ആവിഷ്‌കാരം കണ്ടെത്തുന്നത് സ്മാരകശിലകള്‍ എന്ന നോവലിലാണ്. -