Edukasyon: Patunay Na Daan Tungo Sa Tagumpay
Masasabi na ang edukasyon ay isang mahalagang aspeto sa paghubog ng katauhan, kaalaman at pangarap. Ito ang matibay na pundasyon ng sinomang may ninanais makamit sa buhay. Ito rin ang nagsisilbing hagdan tungo sa ating tagumpay. Ngunit paano mo nga ba tunay na masasabing ang isang tao ay edukado? Paano nga ba nakakaapekto sa buhay ng bawat tao ang tinatawag nilang edukasyon? Paano mo rin ba mapapatunayan na nakamit mo ang tagumpay sa pamamagitan ng edukasyon? Marahil ay naiisip mo na ang pagtatapos ng pag-aaral sa kolehiyo ay maituturing na tagumpay. Oo, tama ka sa iyong naiisip! Ang pagkakaroon ng diploma at makapagtapos ng pag-aaral ay isang karangalan. Ngunit naisip mo rin ba kung hanggang saan ka kayang dalhin ng karangalan at tagumpay na mayroon ka dahil sa iyong diploma. Sa isang banda ay nalalaman natin na ang katibayan ng ating pagtatapos at ang mga medalya na ating natanggap ay nananatiling nakasabit sa pader hanggang sa magabukan. Hindi rin lingid sa ating kaalaman na hindi lahat ng may diploma ay nagtatagumpay at umaangat sa buhay. Ang ilan pa nga’y hindi hamak na salat at lugmok sa kahirapan. Kung ating iisiping mabuti, hindi lang naman ang pag-angat sa estado sa buhay ang basehan ng tagumpay. Ang pagkakaroon ng edukasyon ay isang yaman na walang sinoman ang maaaring mag-angkin o magnakaw maliban sa ating mga sarili. Maraming mga tao ang itinuturing na tagumpay ang pagkakaroon ng maraming pera, malalaking bahay at mga sasakyan, mga ari-arian, at matataas na posisyon. Ngunit marami rin sa kanila ang hindi ginamit sa tama, sa halip ay ginamit sa pang-aabuso ang edukasyon na mayroon sila. May mga pera nga sila ngunit hindi habang buhay ay kaya nilang itago ang marurumi nilang pagkatao sa likod ng mga salaping ginagawa nilang sukatan ng tagumpay. Kung gayon, paano mo pa masasabing ang edukasyon ay daan tungo sa tagumpay kung nagsilbi rin itong daan upang maging masama ang mga tao? May ilan din namang dahil sa sila ay nakapagtapos ng pag-aaral at nakaangat sa buhay ay nagkakaroon ng magaspang na pag-uugali. Ngayon, bakit hindi mo subukang alalahanin kung kailan itinuro sa isang paaralan ang pagkakaroon ng masamang pag-uugali? Kung pagkatapos kang pag-tiyagaang turuan ng iyong mga guro at mga magulang ng mabubuting asal ay mauuwi ka lang bilang isang taong hindi marunong rumespeto, para mo na ring binigo ang mga taong minsang naghangad at nangarap na ang batang tinuruan at inalalayan nila ay magiging isang taong magpapatunay na ang edukasyon ay isang susi upang maabot mo ang tagumpay. Kung ikaw ay isa sa mga mapalad na nagkaroon ng oportunidad na makapag-aral, huwag mo sana itong sayangin. Patunayan natin na ang edukasyon ay isang daan tungo sa tagumpay. Huwag nating kalimutan na ang edukasyon ay isang bagay na dapat nating pahalagahan. Huwag rin nating hayaan na sa ating pagtatapos ng pag-aaral ay kasabay nito ang pagtatapos ng ating pagkatuto. Bagkos, ang edukasyon ang magsisilbing pundasyon upang marating natin ang ninanais natin sa buhay. Hindi medalya o diploma, kundi tayo ang makapagpapatunay na ang pagkakaroon ng edukasyon ay pagkakaroon din ng tagumpay.