Ikalawang Digmaang Pandaigdig

PANIMULA: Ang Ikalawang Digmaang Pandaigdig ay isang pandaigdigang labanan na nagsimula noong Hulyo 7, 1937 sa Asya at Setyembre 1, 1939 sa Europa. Natapos ito hanggang 1945, at nasangkot ang karamihan ng mga bansa sa daigdig at bawat kontinente na may naninirahan. Tinuturing ito na pinakamalawak, pinakamahal at pinakamadugong labanan sa kasaysayan ng sangkatauhan.Maaalalang ang mga bansang lumahok sa digmaan ay nagbuhos ng napakaraming pwersang militar upang lupigin ang bawat panig. Ang Ikalawang Digmaang Pandaigdig ay itinuturing na pinakamapanirang digmaan sa kasaysayan. Kung ang mga operasyong militar sa panahon ng Unang Digmaang Pandaigdig ay Pangunahing naganap sa kontinente ng Europa,ang Ikalawang Digmaang Pandaigdig ay kinasangkutan hindi lamang ng Europa bagkus ay nakasama sa Digmaan ang Asya,Africa at maging ang mga isla sa Pacific. Mahigit sa 17 milyong miyembro ng hukbong sandatahan ng iba’t ibang nagsagupaang bansa ang namatay sa digmaan. Pinahina rin nito ang kakayahang pang-ekonomiya ng mga pangunahing nasyon at iniwanan ang maraming bansa sa bingit ng pagkaguho. Sa pagwawakas ng Unang Digmaang Pandaigdig, ang mga bansang nagtagumpay ay bumuo ng Liga ng mga bansa na naglayong mapanatili ang kapayapaan sakaling magkaroong muli ng agresyon. Hindi naging kasapi ng liga ang United States dahil sa patakaran nitong isolasyon. Nabigo ang liga sa una nitong pagsubok. Noong 1931, ang Japan ay nagsimula ng isang operasyong militar sa paghahangad na masakop ang kabuuan ng Manchuria. Pagkaraang matanggap ng Liga ng mga Bansa ang ulat ng komisyon sa pagsisiyasat, bumuo ang liga ng isang resolusyon na nag-utos sa Japan na iurong ang hukbo nito sa Manchuria. Bunga nito, tumiwalag ang Japan sa Liga. Samantala, ang Manchuria ay naging pamahalaang puppet ng Japan sa ilalim ng pangalang Manchuko. Dahil sa pag-iiringan at hindi pagkakasundo ng mga miyembro, hindi na gumawa ng anumang hakbang ang liga upang masawata ang Japan. Umangat sa kapangyarihan si Adolf Hitler at naging diktador ng germany noong 1933. Tinuligsa niya ang probisyon ng kasunduan ng Versailles na naglimita sa pagsasandata ng germany. Noong 1935, ang diktador ng Italia na si Benito Mussolini ay isinakatuparan ang matagal na niyang planong pananakop sa Ethiopia na ninais niyang maging kolonya. Hindi napatawan ng Liga ng mga bansa ng mabigat na parusa ang Italia kaya tuluyang naokupahan ang Ethiopia noong 1936. Sumiklab ang Ikalawang Digmaang Pandaigdig sa Europa noong 1939 at habang abala ang mga bansang Europeo sa labanan ay sinamantala ng Japan ang pangyayari upang mapalawak ang kanyang teritoryo.

NILALAMAN:
MGA PANGYAYARING NAGBIGAY-DAAN SA IKALAWANG DIGMAANG PANDAIGDIG
Pagkatapos ng Unang Digmaang Pandaigdig, nagsumikap ang mga malalakas na bansa upang mapanatili ang kapayapaan sa buong mundo. Ang malagim na pangyayari noong Unang Digmaan ay sariwa pa sa gunita ng kasaysayan maging ang epekto nito sa pandaigdig na kabuhayan. Ang Great Depression, noong 1924 ay lubos na naramdaman ng buong mundo. Sa mga panahong iyon natuon ang paningin ng mga tao sa kani-kanilang mga pamahalaan upang matugunan ang kawalan ng pagkain, trabaho at iba pang pangunahing kabuhayan.
PAGTATATAG NG NAZISMO, PASISMO AT KOMUNISMO
Dahilan sa nakaatang sa gobyerno ang lahat halos ng pangangailangan ng mga mamamayan, naging daan ito upang lumakas ang kapangyarihan ng pamahalaan ng mga bansa. Upang mapanatili ang balance ng mga bayarin,ipinatupad ang nasyonalismong pangkabuhayan. Binantayan ng bawat bansa ang kanilang kayamanan at naging limitado ang pakikipagkalakalan sa labas. Habang umuusad ang mga bansa sa pang-ekonomiyang seguridad, muling napagtuunan ang pagpapalakas ng kapangyarihang military.
Dahil sa nabanggit na pangyayari, nagpalit ng sistema ng pamahalaanang ibang makapangyarihang bansa. Naging sosyalista ang Russia noong 1917. Ang Germany naman ay pinamumunuan ng mga Nazi sa pangunguna ni Hitler at ang Italia ay nauwi sa Pasismo na pinamumunuan ni Benito Mussolini.
Pasismo- Ang Pasismo ay ang dating awtoritaryang kilusang politikal na namayani sa Italia mula 1922 hanggang 1943 sa ilalim ng pamumuno ni Benito Mussolini.
Nazismo- (o National Socialism, Aleman: Nationalsozialismus) ay pangunahing tumutukoy sa ideolohiya at mga pagsasanay ng Partidong Nazi sa ilalim ni Adolf Hitler; at ang mga patakaran na sinunod ng pamahalaan ng Alemanyang Nazi mula 1933 hanggang 1945, isang panahon na tinatawag na Ikatlong Reich. National Socialist German Workers' Party, (Aleman: Nationalsozialistische Deutsche Arbeiterpartei o NSDAP) ang opisyal na pangalan ng partidong Nazi na lumitaw pagakatapos ng Unang Digmaang Pandaigdig, at pangkalahatang tinuturing ng mga dalubhasa bilang isang anyo ng pasismo. Benito Mussolini Mga Nazi
MGA SUNOD-SUNOD NA PAGLUSOB SA MGA MALILIIT AT MAHIHINANG BANSA
Maraming paglusob ang naganap na pinangunahan ng mga bansang agresor noong Unang Digmaang Pandaigdig. Noong 1936, nilusob ng Italia ang Ethiopia. Kasunod nito, noong 1937, umatake naman ang Japan sa China. Pagkaraan naman ng isang taon (1938) umabante ang mga tropa ni Hitler patungong Austria. Ang mga bansang nabanggit ay tahasang hindi sumunod sa pangkapayapaang kasunduan at sapilitang nang-agaw ng teritoryo sa mga maliliit at mahihinang bansa.
Ang mga bansang England, France at United States ay nagpatuloy pa rin sa kanilang pagsisikap na mapanatili ang kapayapaan kahit na mangahulugan ng pagbibigay sa mga kahilingan ng mga dating agresor na bansa.
Ang pagbibigay ng mga Alyadong Bansa ay nagdulot ng malaking bentahe sa mga agresor na bansa lalo na ang Germany. Agad nitong nilusob ang Poland noong Setyembre 1, 1939. Ang naturang paglusob ang naging hangganan ng pagpapasensya ng dating magkaalyadong bansa. Ang naturang pangyayari ang nagpasiklab sa Ikalawang Digmaang Pandaigdig.
ANG MGA DAHILAN NG PAGKAKAROON NG DIGMAAN AYON SA MGA MANANALAYSAY AY ANG MGA SUMUSUNOD : 1. Hindi naging makatarungan para sa mga Aleman ang mga iginawad ng tratado ng Versailles. 2. Hindi naging epektibo ang Liga ng mga bansa sa pagpapatupad ng mga tuntunin nito. 3. Ang patuloy na pagnanasa ng mga bansa na magpalawak ng kani-kanilang teritoryo. 4. Ang kakulangan ng probisyon sa paglilimita ng mga armas at gamit pandigmaan. 5. Ang tangkang paghihiganti at pagbabagong- puri ng mga dating agresor na bansa lalo na ang Germany. ANG SIMULA NG DIGMAAN
Marubdod ang hangarin ng mga Nazi na mapanumbalik nito ang dating kapangyarihan ng mga Aleman. Nilusob ni Hitler ang Poland noong Setyembre 1, 1939. Nagbunga ito ng pagdedeklara ng Great Britain at France ng pakikidigma laban sa Germany sapagkat nais ng mga nabanggit na bansa na pangalagaan ang Poland. Maraming mga bansa sa Europa ang nasakop ng Germany at maraming mga barkong pandigma ang napalubog ng mga U- boat o submarino ng Germany. Nagdeklara ng pakikidigma laban sa France at Great Britain ang Italia. Sa Asya, nakakitaan ng paghahangad sa mga karatig- bansa ang Japan. Ang ginawa nitong pagsalakay sa China ay walang pasubaling tinuligsa ng United States na ikinainis naman ng Japan at naging dahilan ng pagbomba nito sa Pearl Harbor noong Disyembre 7, 1941. Ang naturang pangyayari ay pansamantalang nakapagparalisa sa puwersang pandagat ng United States sa Pacific. Nagdeklara ng pakikidigma ang Kongreso ng United States laban sa Japan noong Disyembre 8, 1941 samantalang ang Italia at ang Germany naman ay nagdeklara rin laban sa United States. Kasunod nito ay ang pagdedeklara ng pakikidigma ng United States laban sa puwersang Axis. Ang mga magkasalungat na pangkat noon ay ang Puwersang Axis na binubuo ng Germany, Italia at Japan laban sa Puwersang Alyado na kinabibilangan ng Great Britain, France at United States. Ang U – boat at ang Pearl Harbor

ANG DIGMAAN SA PACIFIC
Noong 1937, naglunsad ang Japan ng pakikidigma laban sa China. Dumagsa ang tropang Hapones sa Hilagang Silangang China at kumalat sa timog at kanluran. Nanlaban ang China subalit mahina ang kanilang hukbo at hindi nito napigilan ang pagpasok ng mga Hapon. Sa pagtatapos ng 1938 nakontrol ng Japan ang Hilaga at Gitnang China kasama na ang Lungsod ng Canton.
Ang pag-agaw ng mga Hapones sa mga daungan at sentrong pangkomersyal sa China ay nagbigay sa kanila ng kapangyarihan na limitahan ang mga gawain ng mga dayuhang namumuhunan sa China. Sa huling bahagi ng 1938, inihayag ng Japan ang pagtatatag ng bagong kaayusan sa Silangang Asya kung saan ang Japan ay magtatamasa ng komersyal na pangunguna sa China. Nang sumiklab ang Ikalawang Digmaan sa Europa, nakisimpatya ang Japan sa mga pasistang bansa ng Germany at Italia. Lumagda ito ng pakikipag-alyansa sa dalawang nabanggit na bansa kaya nabuo ang tinawag na Roma-Berlin-Tokyo Axis noong 1940. Samantala, nasakop ng Japan ang French Indochina.
ANG PAG- ATAKE SA PEARL HARBOR
Noong Disyembre 7, 1941 binomba ng mga Hapon ang Pearl Harbor sa Hawaii nang wala man lamang babala. Maraming barkong pandigma ng mga Amerikano ang lumubog at napinsala, 188 eroplano ang nasira at 261 ang napinsala. Humigit kumulang na 2,335 kawal at mga tauhan ang namatay at mayroong 1,403 ang nagtamo ng sugat at pinsala sa katawan. Bunga nito, kinumbinse ng Pangulong Roosevelt ang Kongreso ng United States na magdeklara ng digmaan. Bilang katugunan, nagpahayag ang kongreso ng deklarasyon ng pikikidigma laban sa Japan noong Disyembre 8, 1941 at sa Germany at Italia, mga bansang kakampi ng Japan.
Noong ding araw na iyon nagsimula ang digmaan sa Pacific. Naging estratehiya ng mga Alyado ang pagsugpo sa Japan sa Australia, India, Indo- China, Thailand, Hong Kong, Silangang Indies, Hilagang China, Wake Island at sa Pilipinas. Naging madugo ang labanan sa Guadalcanal, sa Coral Sea at sa Bataan at Corregidor.

Pagbomba sa Pearl Harbor

ANG PAGSALAKAY NG MGA HAPONES SA PILIPINAS Nagkaroon ng pulo-pulutong na pagbomba sa mga lugar sa Pilipinas. Unang binomba ang Davao noong Disyembre 8, 1941 sumunod ang Tuguegarao, Iba, Tarlac, at ang Pampanga kung saan naroon ang base militar ng United States. Hindi nakahanda sa pagsalakay ang mga Amerikano. Naparalisa ang lakas panghimpapawid nito. Sumunod na binomba nang halos araw-araw ang Maynila. Noong Disyembre 10, 1941 pinangunahan ni Kapitan Jesus Villamor ang puwersang panghimpapawid ng Pilipinas upang habulin ang mga eroplano ng mga Hapones sa Nicholas Airfield. Siya ang kauna-unahang Pilipinong piloto na nakapagpabagsak ng eroplano ng mga Hapones sa labanang panghimpapawid at kauna-unahan ding bayaning Pilipino ng Ikalawang Digmaang Pandaigdig. Pinarangalan siya sa pamamagitan ng medalyang Distinguished Service Cross. Sa kasalukuyan, ang dating Nicholas Air Base ay pinangalanang Villamor Air Base bilang parangal Kay Kapitan Jesus Villamor. Nang araw ding iyon ay umatake ang mga Hapon sa Vigan at Aparri sumunod ay ang Lingayen sa Pangasinan, Davao at Tayabas. Napalakas ng puwersang Hapones na hindi mapigil ng mga Pilipino at Amerikano. Kulang sila sa puwersang panghimpapawid at wala pang dumating na saklolo mula sa United States na noon ay abala rin sa pagtatanggol ng kanyang mga teritoryo sa Pacific. Upang huwag mapinsala nang lubusan ang Maynila idineklara itong “bukas na Lungsod” (OPEN CITY) noong Disyembre 26, 1941 ni Heneral Mac Arthur. Subalit hindi ito isinaalang-alang ng mga Hapones. Maraming mga pangwawasak, paninira, pagnanakaw at pagsasamantala ang ginawa sa lungsod. Lumusob sa Maynila ang mga Hapones noong Enero 2, 1942. Sumuko ang mga kawal na Pilipino at Amerikano sa Bataan noong Abril 9, 1942 dahil sa kakulangan ng mga pagkain at medisina. Lahat ng mga sumukong kawal ay pinaglakad mula Bataan hanggang San Fernando, Pampanga. Ito ay tinawag na Death March. Di nagtagal sumuko sa mga Hapon ang mga kawal sa Corregidor noong Mayo 6, 1942.

Death March Bukas na lungsod o Open City ANG IMPERYONG HAPONES Ang militaristikong pananakop ay nagbigay sa Japan ng yamang pang-ekonomiya. Kinontrol nito ang halos ¾ na bahagdan pandaigdig na suplay ng goma at tin na pawang mga kritikal na materyales sa panahon ng digmaan. Ang mga Langis mula sa Dutch East Indies ay nagsuplay sa mga eroplano at trak ng mga Hapones. Tinawag ng Japan ang kanyang imperyo na Greater East Asia Co-Prosperity Sphere.

ASIATIC MONROE DOCTRINE
Eksklusibong responsibilidad ng Japan na mapanatili ang kapayapaan sa Asia sa bagong kaayusang GREATER EAST ASIA CO- PROSPERITY SPHERE. Ang ano mang panghihimasok dito ay sasalansangin ng bansa sa kahit na anong paraan.
Bilang paghahanda sa kanyang balak, nakipagkasundo ang Japan sa Germany sa ANTI-COMINTERM PACT noong Nobyembre, 1936. Sa kasunduang ito, nangako ang Germany na tutulungan niya ang Japan sa sandaling manghimasok ang Russia sa ano mang plano ng Japan sa Asia

ANG MOBILISASYON Nagtagumpay ang puwersang Axis sa mga pakikidigma sa pagitan ng 1939 at 1942 ngunit bumaligtad ang mga kaganapan sa kapakinabangan ng mga Alyadong bansa sa Europa at Pacific. Sa pagpasok ng 1944, ang pagwawakas ng digmaan ay unti- unting natatanaw. Bagaman mahigit sa 40 bansa ang pumanig sa mga Alyado pagpasok ng 1945, tatlo – ang Great Britain, Soviet Union at United States.- ang gumanap sa mahalagang papel sa pagkatalo sa puwersang Axis. Ang mga bansang ito na pinamunuan nila Churchill, Stalin, at Roosevelt ang bumuo ng istratehiyang militar sa panahon ng digmaan. Churchill Stalin Roosevelt Pagkaraan ng pag-atake ng Japan sa Pearl Harbor, naghanda ang United States sa pakikidigma. Tumaas ang produksyon ng eroplano, tangke at mga armas. Naghanda rin ang Great Britain sa digmaan pagkatapos ng pampublikong pangkonsumo dahil sa ang industriya ay natuon sa produksyong ng mga kagamitang pandigma. ANG PAGSALAKAY NG PUWERSANG ALYADO SA EUROPA Iginiit ni Stalin sa Great Britain at United States na atakihin ang puwersang Axis sa panglawang prontera sa Europa upang mabawasan ang presyon sa Soviet Union. Nais ni Stalin na salakayin ang France mula sa Great Britain ngunit ang ibang pinuno ng mga Alyadong bansa ay nagdesisyong tirahin muna ang Italia dahil itinuring nila na mahina ang puwersa nito. ANG PAGSALAKAY SA ITALIA Noong Hulyo 10, 1943 ang magkasanib na puwersa ng Great Britain at United States ay lumunsad sa Sicily. Natalo nila ang hukbo ng Italia sa Sicily sa loob lamang ng isang buwan. Samantala, pinatalsik si Mussolini sa kapangyarihan ng mga opisyal ng Partidong Pasista. Inagaw ni Pietro Badoglio ang pamahalaan at pinaaresto si Mussolini ngunit iniligtas ang huli ng mga Aleman at dinala sa Hilagang Italia. Umanib si Badoglio sa mga Alyadong Bansa ngunit libu-libong tropa ng mga Aleman ang nanatili sa Italia. Noong Hunyo 4, 1944 lumaya ang Roma sa Kontrol ng mga Nazi subalit ang ilang bahagi ng Italia ay nanatili pa rin sa ilalim ng Germany hanggang 1945.
Partidong Pasista- Ang mga pasistang partido, grupo at kilusan ay nakaiimpluwensya na sa burges na propaganda at naghahanda sa pag-agaw ng inisyatiba mula sa mga partidong burges-demokratiko. Heneral Eisenhower Pietro Badoglio ANG PAGSALAKAY SA FRANCE Habang ang puwersa ng Britain at United States ay nakikipaglaban sa Italia, ang mga heneral ng Puwersang Alyado ay naghahanda sa pagsalakay sa France sa ilalim ng pamumuno ni Heneral Eisenhower, isang malaking hukbo ang nagtipon sa Britain. D- day - ang tawag sa araw ng pagsalakay noong Hunyo 6, 1944. Sa loob ng 24 na oras, 120,000 tropa ang lumunsad sa baybayin ng Normandy at makalipas ang tatlong linggo ay dumating pa ang higit- kumulang sa 800,000 sundalo. Sa kabila ng paglaban ng mga Aleman, nagtagumpay ang mga Alyado na makatawid sa baybaying rehiyon ng Hilagang France sa kalagitnaan ng Agosto. Sa buwan ding ito, isa pang puwersa ng mga Alyadong bansa ang sumakop sa Timog France. Ang unang tropa ng mga Alyado ay nakapasok sa Paris noong Agosto 25. Nagwakas ang pamumuno ng Nazi sa France at naghanda ang Puwersang Alyado sa pananakop sa Germany. D-day ANG PAGTULAK SA BERLIN Mahigit isang taon bago ang pananakop sa Normandy, sinimulang bombahin ng mga Alyado ang Germany. Tinawid ng mga sundalong Alyado sa kalagitnaan ng Setyembre, 1944 ngunit napigilan ng mga Aleman ang kanilang pagmamartsa. Sa huling bahagi ng buwan ng Abril, nakalapit ang puwersa ng mga Amerikano sa Berlin mula sa kanluran samantalang ang hukbo ng mga Ruso ay tumulak sa hilaga. Unti- unting bumagsak ang lakas ng Germany at Italia. Nagtangkang tumakas si Mussolini patungong Switzerland ngunit nahuli siya at napatay ng hukbong Italyano noong Abril, 1945.Sa paglapit ng tropang Alyado sa Berlin, nagtago si Hitler at nang mabatid niyang matalo ang Germany, siya ay nagpakamatay noong Abril 30, 1945. Isang linggo pagkaraang mamatay si Hitler, sumuko ang Germany sa mga Alyado noong Mayo 7. Ito ang naghudyat ng pagwawakas ng digmaan sa Europa.

ANG WAKAS NG IKALAWANG DIGMAANG PANDAIGDIG Sa kumperensya sa Postdam, tinalakay nina Pangulong Truman ng United States, Punong Ministro Churchill ng Great Britain at Stalin ng Russia ang mga pang- kapayapaang alok para sa mga kalabang puwersang Axis. Abala ang mga B- 29 na eroplano ng mga puwersang Alyado sa pagbabagsak ng mga bombang umaabot sa isang libo linggu- linggo. Sa kabila nito, naging matigas pa rin ang Japan. Ayaw nitong sumuko kung kaya binagsakan ng bomba atomika ang Hiroshima sa Japan noong Agosto 6, 1945 ng mga Alyado. Nang hindi pa rin ito sumuko, binagsakan din ng bomba atomika ang Nagasaki noong Agosto 9, 1945. Nasira ang dalawang nabanggit na lungsod at mahigit 100,000 katao ang namatay. Sumuko si Emperador Hirohito kay Heneral Douglas McArthur noong Setyembre 2, 1945 sa isang seremoyang ginanap sa barkong USS Missouri sa look ng Tokyo. MGA PAGBABAGONG PULITIKAL NA BUNGA NG IKALAWANG DIGMAANG PANDAIGDIG Ang Ikalawang Digmaang Pandaigdig ay isang labanan sa pagitan ng mga bansang demokratiko at mga bansang agresor. Nagsanib ang mga bansang mapanakop gaya ng Japan, Germany at Italia kasama ang Bulgaria at Hungary. Sa panig naman ng mga bansang demokratiko ay nagsama-sama ang France, Great Britain, United States, Canada, Australia, New Zealand, China, Greece, Mexico, Yugoslavia, Brazil gayundin ang Russia. Tumagal nang anim na taon ang digmaan simula 1939 hanggang 1945. Sinasabing ito ang pinakamadugo at pinakamapinsalang digmaan sa kasaysayan. Sumuko ang Japan noong Agosto14, 1945 at bunga ng digmaan, malaking pagbabago ang naganap sa larangan ng pulitika. - Heneral Douglas McArthur at Emperador Barkong USS Missouri Hirohito

ILAN SA MGA PAGBABAGONG ITO AY ANG MGA SUMUSUNOD: 1. Nagtagumpay ang demokrasya laban sa mga bansang agresor. Nagupo ang Japan, Germany at Italia. 2. Bumagsak ang Imperyong Aleman na itinaguyod ni Adolf Hitler, ang Imperyong Italyano ni Mussolini at ang Imperyong Hapon ni Emperador Hirohito. 3. Bunga ng digmaan ay isinilang ang karamihan sa malalayang bansa sa Asya tulad ng Pilipinas, India, Burma, Pakistan, Jordan, Syria, Lebanon, at iba pa. 4. Dahil sa pagkakaiba ng ideolohiya at paniniwala ay nahati ang India sa dalawa- ang Pakistan na dinomina ng mga muslim at ang India na ang karamihan ay mga Hindu. Nahati sa silangan at kanluran ang Germany. Ang Silangang Germany ay sumunod sa ideolohiya ng komunismo samantalang ang Kanlurang Germany ay demokratiko. Ganito rin ang naging pangyayari sa Korea, China at Vietnam. 5. Bunga ng digmaan ay namatay ang kolonyalismo ng mga kanluranin. Isa-isang tumayo ang mga kolonya ng mga kanluranin sa Asya at Africa. 6. Umiral ang dalawang magkasalungat na ideolohiya- ang demokrasya at komunismo. Ang United States ay naging simbolo ng mga bansang kumakatawan sa demokrasya at ang Russia ay nanguna sa mga bansang komunista. Demokrasya- ay isang uri ng pamahalaan na direktang pinamamahalaan ng mga tao o ng kanilang mga kinatawan. Komunismo- ay isang ideolohiya na umaayon sa pagtatag ng organisasyon pangsosyal na walang estado at kaantas- antas batay sa pantay at hindi pribado ang pag-aari ng mga kagamitan sa produksyon. 7. Naitatag ang United Nations bilang isang organisasyon na mangangalaga sa pandaigdigang kapayapaan, kalayaan at katarungan.

EPEKTO NG DIGMAAN Isang epekto ng digmaan ay hindi lubusang natuklasan hanggang sa ang mga Alyadong sundalo ay nagmartsa sa Germany. Ito ay bunga ng patakaran ni Hitler na tinawag na Final Solution of the Jewish Question – ang lubusang pagpuksa sa mga Hudyo sa Europa. Sa ilang lugar na inokupa ng mga Nazi ang lahat ng pamayanang Hudyo ay binaon sa isang malaking hukay. Sa Babi Yar sa Ukraine 33,000 Hudyo mula sa Kiev ang pinatay sa loob lamang ng dalawang araw. Ang maramihang pagpatay sa mga hudyo sa pamamagitan ng pagbaril ay lubhang mabagal at ginawa sa harap ng publiko. Nagtayo ang mga Nazi ng malalaking kampo na pinaglalagyan sa mga hudyo bago patayin ang mga ito. Naging bantog ang mga kampo ng Auschwitz, Maidanek at Treblinka sa Poland. Ang ibang kampo ay nasa Germany. Humigit kumulang sa anim na milyong mga hudyo ang namatay sa tinaguriang Holocaust- isang sistematikong pagpatay sa mga hudyo na isinagawa ng mga Nazi. Hindi lamang mga hudyo ang nilipol, nakabilang din ang mga Slav, Gypsies, mga baldado at mga bihag na kaaway ng mga Nazi. MGA ISYUNG PULITIKAL SA EUROPA Bago ang Ikalawang Digmaang Pandaigdig, may hindi pagkakaunawaang namagitan sa Soviet Union at ng mga malalakas na bansa sa kanluran. Maraming mamamayan sa kanluran ang kinondena ang diktadurya ni Stalin. Ang mga Ruso, sa isang bahagi ay tinuligsa ang tinagurian nilang imperyalismo ng mga Kanluranin. Ang kahalagahan ng pakikidigma laban sa mga Nazi ng Germany ay nagbunsod sa pag-aalyansa ng Soviet Union, Great Britain at United States, ngunit sa pagwawakas ng digmaan, muling nabuhay ang sigalutan ng Silangan at Kanlurang Europa. Ang kinabukasanng Silangang Europa ay naging mahalagang isyu sa pagwawakas ng Ikalawang Digmaang Pandaigdig. Ang mga bansang Axis na Bulgaria, Rumania, at Hungary ay sumuko sa Soviet Union. Ang tropa ng mga Ruso ay siya rin nagtaboy sa Nazi sa Poland at Czechoslovakia. Sa pagwawakas ng digmaan, inokupa ng mga Ruso ang malaking bahagi ng Silangang Europa. Ipinangako ni Stalin na hahayaan niya ang mga tao na pumili at magpasya ng kanilang kahihinatnan sa pamamagitan ng isang halalan. Gayunpaman, nangamba ang mga Alyado na igigiit ni Stalin ang rehimeng komunismo sa rehiyon. Isa pang isyung pulitikal na lumitaw nang nagwakas ang digmaan ay ang pagtrato sa Germany. Hinangad ng mga pinunong Ruso na bumuo ng isang mahinang estadong Aleman na madaling maimpluwensyahan ng Moscow. Sinalungat naman ng Britain at United States ang planong ito. ANG DAIGDIG PAGKATAPOS NG DIGMAAN Ang nasyonalismoay isang pangunahing puwersang pandaigdig. Sa mga kolonyang pinamunuan ng mga bansang Europeo, naging malakas ang paghahangad ng kalayaan. Ang mga tao sa ilang mga kolonya katulad ng India na nakipaglaban sa panahon ng Ikalawang Digmaang Pandaigdig ay pinangakuan ng kalayaan bilang gantimpala. Sa ibang mga kolonya gaya ng French Indochina, ang mga nasyonalista ay lumaban sa mga Hapon at determinadong hindi na muling pumailalim sa mga kanluranin. Ang digmaan ay nagdulot ng mga pagbabagong panlipunan sa maraming bansa. Sa United States, ang mga Amerikanong itim ay binigyan ng pagkakataong makapagtrabaho. Noong Hunyo 1941, nagpalabas si Pangulong Roosevelt ng kautusan na nagbabawal sa diskriminasyon sa mga establisyamentong binigyang proteksyon ng pamahalaan. Ang pagkilos na ito ni Pangulong Roosevelt ay nagbigay pag-asa sa iba pang aksiyon ng pamahalaan laban sa diskriminasyon. Nagbago rin ang katayuan ng mga kababaihan dahil higit na lamawak ang kanilang oportunidad sa lipunan.Ang paggamit ng bomba atomika ay nagkaroon ng higit na malaking epekto pagkatapos ng digmaan. Marami ang nagwika na ang mga taon simula 1945 ay panahon ng atomika o Atomic Age.

MGA KAGANAPAN SA ASYA AT EUROPA BAGO SUMIKLAB ANG IKALAWANG DIGMAANG PANDAIGDIG SA PACIFIC SA EUROPA: | Sa Asya: | Ika-1 ng Setyembre, 1939 nagsimula na ang ikalawang digmaang pandaigdig nang sakupin ni Hitler ang Poland. | Ipinagbawal ng Japan sa France ang pagdadala ng mga suplay na pandigma na idinaan sa Indochina. | Sunod-sunod na tinalo ng Germany ang Denmark, Norway, Holland, Belguim at France. | Sinakop ng Japan ang Indochina at nagtalaga ng mga baseng pandigma laban sa China. | Sa loob ng 70 araw napaurong ng mga Aleman ang mga hukbong Ingles. | Pinagbawalan ng Japan ang Britain na magsuplay ng kagamitan sa China mula sa Burma. | Sumanib ang Italy sa Germany | Humiling ng higit na suplay ng langis, goma, at lata ang Japan sa Netherlands East Indies. | Naiwang nag-iisa ang Birtain sa pakikipagtunggali sa Germany. | Sinikap naman ng mga tsino na gumawa ng daanan mula sa mga bundok ng malayang China patungong Burma. | | Sa pamamagitan ng Russo-Japanese Neutrality Pact, nakipagkasundo ang Japan sa Russia na mamamalagi silang Neutral sakaling masangkot ang isa sa kanila sa digmaan. | | Nagkasundo ang dalawang bansa ukol sa kanilang hangganan sa pagitan ng Siberia at Manchukuo at Mongolia at Siberia. | REAKSYON:
Ang Ikalawang Digmaang Pandaigdig ay napakalagim na pangyayari sa ating kasaysayan. Maraming tao ang naghirap, namatay, at marami ang napinsala. Sobra –sobra ang mga paghihirap noong Ikalawang Digmaang pandaigdig. Kaya lang naman tayo nasangkot sa Ikalawang Digmaang Pandaigdig ay dahil sa pagiging kolonya ng Pilipinas sa United States. Malaking paghihirap ang tiniis ng mga Pilipino sa pananakop ng mga Hapones, Pasalamat tayo dahil dumating sa atin ang Demokrasya at hindi na natin naranasan ito. Sa ilalim ng pananakop ng mga Espanol, Amerikano, at Hapon nagkaisa ang mg Pilipino para sa iisang mithiin- KALAYAAN. Ito ang magandang naidulot ng Ikalawang Digmaang Pandaigdig sa ating bansa. Naging malaking pagsubok sa mga Pilipino ang pagpasok ng mga dayuhan sa ating bansa na tila naglalaro ang tadhana nang maganap ang digmaan. Ang mga Asiano ay lubusang nagdusa bunga ng Ikalawang Digmaan Pandaigdig. Kapansin-pansin ang rebolusyong lumaganap sa larangang pulitikal, sosyal, at ekonomikong aspeto ng buhay. Ang mga bansang dati rati’y pinamamahalaan ng mga kanluranin ay nagsikap makawala sa pagkakabigkis ng bansang may hawak sa kanila. May ilan naman na nauwi sa panloob na hidwaan, sanhi ng pagkakaiba-iba ng paniniwala dahil sa pagkakaiba ng ideolohiya, at relihiyon.Nagkaroon man ng hidwaan o nagkamit ng kasarinlan, ang pinaka-mahalaga ay nagwakas na ang Ikalawang Digmaang Pandaigdig na sana’y huwag ng maulit muli.